Donald Tramp Eronga mamlakatni birgalikda boshqarishni taklif qildi
Tramp Ho‘rmuz bo‘g‘ozini oliy rahnamo bilan nazorat qilishini aytdi.
AQSH prezidenti Donald Tramp Eronga “qo‘shma rahbariyat” shaklidagi boshqaruvni taklif qildi. Tramp bu haqda 23-mart kuni Tehron bilan muzokaralar o‘tkazilgani haqidagi xabarlar fonida ma’lum qildi.
Trampning aytishicha, to‘rt haftadan beri davom etayotgan harbiy keskinlik sharoitida AQSH Eronni nomi oshkor etilmagan eronlik yetakchi bilan birgalikda boshqarishi mumkin. U mamlakatda “rejim o‘zgarishining juda jiddiy shakli” yuz berishi ehtimolini ham tilga oldi.
“O‘ylaymanki, bu qo‘shma yetakchilik bo‘lishi mumkin”, — dedi Oq uy rahbari.
Shuningdek, Tramp AQSH Venesueladagi kabi yangi yetakchini qo‘llab-quvvatlash variantini ham ko‘rib chiqishi mumkinligini bildirdi.
Prezident 23-mart kuni Eron energetika infratuzilmasiga rejalashtirilgan zarbalarni besh kunga qoldirishga qaror qilganini ma’lum qildi. Uning so‘zlariga ko‘ra, bu qarorga Isroil ham amal qiladi.
Avvalroq Tramp Eron hukumatiga Hormuz bo‘g‘ozini qayta ochish uchun 48 soat muddat bergan edi.
Tramp “juda jiddiy muzokaralar” olib borilayotganini ta’kidlab, mazkur bo‘g‘oz ustidan nazorat ham muhokama qilinayotganini bildirdi. “Bo‘g‘ozni men va rahnamo birgalikda nazorat qilishimiz mumkin”, — dedi u.
AQSH prezidenti, shuningdek, Eron rasmiylari yadroviy quroldan voz kechish talabiga rozi bo‘lganini iddao qildi. Biroq Eron OAVlari ikki davlat o‘rtasida hech qanday muzokaralar o‘tkazilmaganini ma’lum qilmoqda.
Trampning havo zarbalarini kechiktirgani haqidagi xabarlar ortidan jahon moliya bozorlarida keskin o‘zgarishlar kuzatildi. Xususan, Brent markali neft narxi 14 foizga pasayib, bir barreli uchun 96 dollargacha tushdi.
