Kuba AQShning harbiy bosqiniga tayyorlanmoqda

Kuba vazirlar mahkamasi vakili, o‘rinbosar tashqi ishlar vaziri Karlos Fernandez de Kassio hafta oxirida mamlakat harbiylari AQShdan harbiy tajovuz ehtimoliga tayyorlanayotganini ma’lum qildi. 

 

U NBC News’ning “Meet the Press” dasturiga bergan intervyusida, Kuba rahbarlari dunyodagi vaziyatni inobatga olgan holda mumkin bo‘lgan mojaro ehtimolini inkor etish “ahmoqlik” bo‘lishini ta’kidladi.

 

Fernandez de Kassio so‘zlariga ko‘ra, Kuba rahbarlari ushbu mojaroning sodir bo‘lmasligiga chin dildan umid qilmoqda.

 

So‘nggi oylar ichida AQSh va Kuba o‘rtasidagi tarangliklar oshdi. Bunga sabab, AQShning Venesuela operatsiyasi bo‘lib, prezident Nikolas Maduroning hibsga olinishi va uning Kuba rahbariyati bilan yaqin aloqasi bo‘ldi. Ushbu operatsiyadan so‘ng AQSh Prezidenti Donald Tramp va Davlat kotibi Marko Rubio Kubaga harbiy aralashuv ehtimoli mavjudligini bildirdi.

 

Yanvar oyida Prezident Tramp Kubaga neft yetkazib beradigan mamlakatlarga tariflar joriy etishni buyuruvchi farmonni imzoladi. 

 

Shundan keyin orolda aholiga doimiy ravishda elektr uzilishi kuzatilmoqda. Ushbu oyda mamlakat uch marta elektrsiz qoldi. Fernandez de Kassio blokadani AQShning Kuba bilan agressiyasi natijasi deb atadi va uning “cheksiz davom eta olmasligini” ta’kidladi.

 

Tramp esa shu oy boshida Kubani tez orada “qulashini” va rahbarlar bilan kelishuv tuzishga intilayotganini bildirgan. Keyinchalik u “Kubani egallash” sharafiga ega bo‘lishini, uni har qanday yo‘l bilan bosib olishini aytgan edi.

 

Fernandez de Kassio bu bayonotga javoban: “Biz nima haqida gaplashayotganlarini bilmaymiz. Lekin shuni aytishim mumkinki, Kuba suveren davlat va suverenlik huquqiga ega,”, — dedi.

 

Avvalroq Kuba prezidenti ham mamlakat AQShning har qanday hujumiga yengib bo‘lmaydigan qarshilik ko‘rsatishini bildirgan edi.