“Ho‘rmuz bo‘g‘ozi do‘st davlatlar uchun ochiq” — Eron TIV rahbari
Abbos Aroqchi bo‘g‘oz faqat dushman davlatlar va ularning ittifoqchilari uchun yopiqligini bildirdi.
Eron Tashqi ishlar vaziri Abbos Aroqchi davlat televideniyasiga bergan intervyusida Ho‘rmuz bo‘g‘ozining do‘st davlatlar, jumladan Hindiston, Rossiya, Xitoy, Pokiston va Iroq kemalari uchun ochiq ekanini ma’lum qildi.
Vazirning so‘zlariga ko‘ra, bo‘g‘oz jahon neft va gaz savdosining taxminan beshdan bir qismini tashkil etsa-da, u butunlay yopilmagan.
“Bizga xavfsiz o‘tish uchun so‘rov bildirgan do‘st davlatlar kemalariga qurolli kuchlarimiz orqali xavfsiz o‘tish ta’minlandi. Bu keyinchalik ham davom etadi”, – dedi Aroqchi.
Shuningdek, vazir AQSh, Isroil va ularning ittifoqchilariga tegishli kemalarning bo‘g‘ozdan o‘tishiga ruxsat berilmasligini ta’kidladi.
“Mintaqada urush bo‘lyapti. Dushmanlarimiz va ularning ittifoqchilari uchun Ho‘rmuz bo‘g‘ozidan o‘tish taqiqlanadi. Boshqalarga esa yo‘l ochiq”, – dedi vazir.
Mazkur bayonot, BMT Bosh kotibi Antonio Guterrishning Ho‘rmuz bo‘g‘ozini qayta ochish chaqiruvidan so‘ng e’lon qilindi. Shu bilan birga, Eron hozircha AQSh bilan muzokara o‘tkazish rejasi yo‘qligini ma’lum qilgan.
