O‘zbekiston fuqarolari Italiyaga mavsumiy ishga jalb qilinadi
Pilot loyiha doirasida 100 nafar o‘zbekistonlik ish bilan ta’minladi.
O‘zbekistonliklar Italiyaning agrar sohasiga ishga jalb etiladi. Bu haqda Migratsiya agentligi xabar berdi.
Ma’lum qilinishicha, Migratsiya agentligi rahbari Behzod Musayev, Qishloq xo‘jaligi vaziri Ibrohim Abdurahmonov, Italiya Qishloq xo‘jaligi vaziri Franchesko Lollobrijida, shuningdek, Confagricoltura tashkiloti vitse-prezidenti Luka Brondelli ishtirokida uchrashuv bo‘lib o‘tdi.
Mazkur uchrashuvda O‘zbekiston fuqarolarini Italiyaning agrar sohasiga ishga jalb etish bo‘yicha kelishuvga erishilgan.
Shuningdek, Migratsiya agentligi hamda Italiyaning “Associazione Imprese Ortofrutticole“ tashkiloti o‘rtasida hamkorlik bitimi imzolandi.
Ushbu kelishuvga ko‘ra, o‘zbekistonliklar Italiyaga 3 oydan 9 oygacha bo‘lgan mavsumiy ishlarga jalb etiladi.
Associazione Imprese Ortofrutticole assotsiatsiyasi Italiyada meva-sabzavot sohasidagi 35 dan ortiq yirik kompaniyani birlashtirib, fermerlikdan tortib qayta ishlash, logistika va eksportgacha bo‘lgan to‘liq agrosanoat zanjirini qamrab oladi. Asosiy mahsulotlari: olma, kivi, anor, qulupnay kabi mevalar.
Assotsiatsiya prezidenti Marko Salvi joriy yilning o‘zida pilot loyiha doirasida 100 nafar o‘zbekistonlikni ish bilan ta’minlashga tayyor ekanligini bildirgan.
Avvalroq O‘zbekiston fuqarolari AQSHga qishloq xo‘jaligi sohasidagi 9–10 oy davom etadigan mavsumiy ishlarga jalb qilinishi, o‘rtacha oylik 3 500 dollarni tashkil qilishi haqida xabar berilgandi.
