Quruqlikdagi ehtimoliy harbiy amaliyot uchun Eron bir million askarini safarbar qildi — Mehr
Eronlik yoshlar tomonidan harbiy tuzilmalar safiga qo‘shilish uchun berilayotgan arizalar soni keskin oshgan.
Yaqin Sharqdagi hamda Vashington bilan munosabatlardagi harbiy-siyosiy keskinlikning kuchayishi Tehronni ehtimoliy tahdidlarga qarshi turish uchun keng ko‘lamli safarbarlikni boshlashga undadi. Bu haqda Point nashri Mehr axborot agentligiga tayanib xabar berdi.
Mehr agentligining mazkur masaladan xabardor manbaga tayanib yozishicha, AQSh qo‘shinlariga qarshi ehtimoliy quruqlikdagi to‘qnashuv uchun bir milliondan ortiq eronlik jangchilar safarbar etilgan.
Eronning Tasnim agentligi ham agar AQSh quruqlikdan hujum boshlasa, amerikalik harbiylar uchun “tarixiy do‘zax” yaratish g‘oyasi atrofida harbiylar orasida “kuchli ruhiy ko‘tarinkilik” yuzaga kelganini yozmoqda.
Qayd etilishicha, so‘nggi kunlarda eronlik yoshlar tomonidan “Basij” tuzilmalari, Islom inqilobi qo‘riqchilari korpusi va muntazam armiya safiga qo‘shilish istagi bilan berilayotgan arizalar soni keskin oshgan.
“Qo‘shma Shtatlar Ho‘rmuz bo‘g‘ozini o‘zini halokatga olib boruvchi taktika orqali ochmoqchi; mayli. Biz ularning bunday ‘o‘zini yo‘q qilish strategiyasi’ni amalga oshirishiga ham, bo‘g‘ozning yopiq qolishiga ham tayyormiz”, — deya ma’lum qilgan bir harbiy.
Mazkur xabar AQSh prezidenti Donald Trampning strategik ahamiyatga ega neft markazi bo‘lgan va muhim dengiz yo‘lini nazorat qilishga xizmat qiluvchi Xarg orolini egallash bilan tahdid qilgani fonida yangradi.
Eron davlat televideniyesi 25-mart kuni Tehron rasmiylari o‘t ochishni to‘xtatish bo‘yicha taklifni rad etganini ma’lum qilgan. Buning o‘rniga Eron AQShning Fors ko‘rfazidagi barcha harbiy bazalarini yopishni, tovon puli to‘lanishini hamda Isroilning “Hizbulloh”ga qarshi amalga oshirayotgan zarbalarini to‘xtatishni talab qilmoqda.
“Eron Ho‘rmuz bo‘g‘ozini o‘z nazoratiga olishni ko‘zlamoqda. Bu Misrning Suvaysh kanaliga nisbatan yuritgan siyosatiga o‘xshash ssenariy bo‘lib, unga ko‘ra bo‘g‘ozdan o‘tuvchi kemalardan tranzit to‘lovlari undirilishi mumkin”, deyiladi xabarda.
Avvalroq Qo‘shma Shtatlar yaqin orada Eron hududida quruqlik amaliyoti o‘tkazishi rejalashtirayotgani haqida xabar bergandik.
