AQSh Eronga qarshi urush xarajatlarini arab davlatlariga to‘latmoqchi
Donald Tramp mazkur masala yuzasidan alohida bayonot beradi.
AQSh ma’muriyati arab davlatlari tomonidan Eronga qarshi harbiy operatsiya xarajatlarini qoplash masalasini ko‘rib chiqmoqda. Bu haqda Oq uy matbuot kotibi Kerolayn Levitt jurnalistlar uchun o‘tkazilgan brifingda ma’lum qildi.
Levittning ta’kidlashicha, Donald Tramp arab davlatlarini ushbu tashabbusni qo‘llab-quvvatlashga chaqirishdan manfaatdor bo‘ladi. Oq uy vakili prezident bu masala yuzasidan keyinchalik alohida bayonot berishini ham qo‘shimcha qildi.
Shuningdek, Levitt Tehronning ommaga aytadigan gaplari AQSH rasmiylariga xususiy tarzda aytganlaridan farq qilayotganini va Eron Vashingtonning ayrim takliflariga norasmiy ravishda rozi bo‘lganini bildirdi.
Avvalroq, 28-fevral kuni AQSh va Isroil Eron hududidagi qator shaharlarga havo zarbalari berib, harbiy operatsiyani boshlagani xabar qilingandi. Bunga javoban Eron Isroilga raketa hujumlari uyushtirdi, shuningdek Fors ko‘rfazi hududidagi AQSh harbiy bazalariga zarba berdi.
Keskinlashgan vaziyat fonida mintaqaning bir qator davlatlari havo hududini vaqtincha yopdi.
Shuningdek, AQSh tomonidan Eron rasmiylariga Yaqin Sharqdagi mojaroni tartibga solishga qaratilgan 15 banddan iborat reja taqdim etilgani ham ma’lum qilingan. Eron tomoni esa mazkur rejalarni real emas, deb hisoblagan.
