Mojtabo Xomanaiy tez orada ommaga ko‘rinish beradi — Eron TIV
Eron Tashqi ishlar vazirligi Xomanaiyning sog‘lig‘i haqida tarqalgan mish-mishlarga izoh berdi.
Eron Tashqi ishlar vazirligi mamlakat Oliy rahbari Mojtabo Xomanaiyning sog‘lig‘i haqida tarqalgan mish-mishlarga munosabat bildirdi.
TIV rasmiy vakili Ismoil Bag‘ayi Al-Masry al-Youm nashriga bergan intervyusida Xomanaiyning sog‘lig‘i yaxshi ekanini ma’lum qilgan.
Uning so‘zlariga ko‘ra, rahbarning jamoatchilik oldida hozircha ko‘rinmasligi mamlakatdagi murakkab vaziyat bilan bog‘liq bo‘lishi mumkin.
“Bu borada turli gap-so‘zlar tarqalmoqda, biroq ishonch bilan aytish mumkinki, uning sog‘lig‘i yaxshi. Mamlakat urush sharoitida bo‘lganini inobatga olsak, rahbarning omma oldida paydo bo‘lishi uchun biroz vaqt kerak bo‘lishi tabiiy”, — dedi Bag‘ayi.
Shuningdek, u mavjud vaziyatga qaramay davlat boshqaruvi va mudofaa tizimi samarali faoliyat yuritayotganini ta’kidlagan.
Ma’lumot uchun, Mojtabo Xomanaiy 8-mart kuni Eronning Oliy rahbari etib saylangan. U ilgari ushbu lavozimni egallagan Ali Xomanaiyning o‘g‘li hisoblanadi. Avvalroq Ali Xomanaiy 28-fevral kuni AQSh va Isroil tomonidan amalga oshirilgan hujum oqibatida halok bo‘lgani xabar qilingan edi.
