Эронда Можтаба Хоманаий янги Олий раҳбар этиб сайланди
Экспертлар кенгаши қарорига кўра, у мамлакатнинг учинчи Олий раҳбари сифатида расман тасдиқланди.
Эронда мамлакатнинг янги Олий раҳбарини сайлаш жараёни якунланди. Экспертлар Кенгаши қарорига кўра, марҳум раҳбарнинг ўғли Можтаба Хоманаий мамлакатнинг янги Олий раҳбари этиб сайланди. Бу ҳақда Reuters агентлиги Экспертлар кенгаши баёнотига таяниб хабар берди.
Баёнотда айтилишига кўра, оятуллоҳ Сейид Можтаба Ҳусайний Хоманаий Ислом Республикасининг учинчи Олий раҳбари сифатида расман тасдиқланган.
56 ёшли руҳоний ва сиёсий арбоб узоқ йиллардан бери Эрон сиёсий тизимида муҳим шахс сифатида танилиб келган. У, шунингдек, Ислом инқилоби қўриқчилари корпуси билан яқин алоқалари билан ҳам тилга олинади. Эрон сиёсий тизимига кўра, Олий раҳбар давлатдаги энг юқори лавозим ҳисобланади ва у ташқи сиёсат, ҳарбий стратегия ҳамда мамлакатнинг асосий сиёсий қарорларида якуний сўзга эга.
Нашрларнинг ёзишича, янги раҳбарнинг сайланиши Доналд Трамп томонидан билдирилган баёнотлар фонида амалга оширилган. АҚШ президенти аввалроқ Вашингтон Эроннинг янги раҳбарини танлаш жараёнида мамлакат сиёсий йўналишини ўзгартиришга қаратилган таъсир ўтказиш ниятида эканини билдирган эди.
Шунингдек, Исроил расмийлари ҳам Эроннинг янги раҳбари аввалги қатъий сиёсатни давом эттирса, у ҳужумлар учун қонунли нишон бўлиши мумкинлиги ҳақида огоҳлантирган.
