Mujtabo Xomanaiyning maslahatchisi og‘ir yaralangan — Al Hadath

Eron oliy rahnamosi Mujtabo Xomanaiyning maslahatchisi Kamol Xarroziy aviahujumlar oqibatida og‘ir yaralangan. Bu haqda Al Hadath telekanali xabar berdi.

 

Manbalarga ko‘ra, Tehronga uyushtirilgan zarbalar vaqtida Xarroziy nishonga olingan va jarohat olgan. Uning ahvoli og‘ir ekani aytilmoqda. Eron rasmiylari hozircha ushbu xabar yuzasidan rasmiy izoh bermagan.

 

Avvalroq AQSH va Isroil tomonidan 28-fevral kuni boshlangan hujumlar oqibatida Eronning oliy rahnamosi Oyatulloh Ali Xomanaiy halok bo‘lgan, u bilan birga uning yaqin oila a’zolari — kelini, qizi va nabirasi ham vafot etgani e’lon qilingan.

 

Shundan so‘ng Mujtaba Xomanaiy otasining o‘rnini egallab, Eronning yangi oliy rahnamosiga aylangani ma’lum qilingan. Ayrim manbalarda u ham havo hujumlari vaqtida jarohat olgani va Rossiyaga olib ketilgani qayd etilgan.

 

Kuvaytning Al Jarida nashri manbasiga ko‘ra, Mujtabo Xomanaiy Moskvaga yetkazilgach, jarrohlik amaliyotini o‘tkazgan va hozirda Rossiya prezidenti Vladimir Putinning qarorgohlaridan biridagi xususiy tibbiyot muassasasida davolanmoqda.

 

Manbalarda uning davolanishi kuchaytirilgan xavfsizlik choralariga rioya etilgan holda olib borilayotgani qayd etilgan. Xususan, ehtimoliy suiqasd tahdidlari sababli uning joylashuvi sir tutilmoqda.

 

Eron Tashqi ishlar vazirligi matbuot kotibi Ismoil Bag‘oiy esa oliy rahnamo salomatligi haqida izoh berib, uning ahvoli barqaror ekanini bildirgan. Uning ta’kidlashicha, urush sharoitida Mujtabo Xomanaiyning omma oldida ko‘rinish berishi uchun ma’lum vaqt talab etilishi tabiiy hol.