Можтабо Хоманаий тез орада оммага кўриниш беради — Эрон ТИВ
Эрон Ташқи ишлар вазирлиги Хоманаийнинг соғлиғи ҳақида тарқалган миш-мишларга изоҳ берди.
Эрон Ташқи ишлар вазирлиги мамлакат Олий раҳбари Можтабо Хоманаийнинг соғлиғи ҳақида тарқалган миш-мишларга муносабат билдирди.
ТИВ расмий вакили Исмоил Бағайи Al-Masry al-Youm нашрига берган интервьюсида Хоманаийнинг соғлиғи яхши эканини маълум қилган.
Унинг сўзларига кўра, раҳбарнинг жамоатчилик олдида ҳозирча кўринмаслиги мамлакатдаги мураккаб вазият билан боғлиқ бўлиши мумкин.
“Бу борада турли гап-сўзлар тарқалмоқда, бироқ ишонч билан айтиш мумкинки, унинг соғлиғи яхши. Мамлакат уруш шароитида бўлганини инобатга олсак, раҳбарнинг омма олдида пайдо бўлиши учун бироз вақт керак бўлиши табиий”, — деди Бағайи.
Шунингдек, у мавжуд вазиятга қарамай давлат бошқаруви ва мудофаа тизими самарали фаолият юритаётганини таъкидлаган.
Маълумот учун, Можтабо Хоманаий 8 март куни Эроннинг Олий раҳбари этиб сайланган. У илгари ушбу лавозимни эгаллаган Али Хоманаийнинг ўғли ҳисобланади. Аввалроқ Али Хоманаий 28 февраль куни АҚШ ва Исроил томонидан амалга оширилган ҳужум оқибатида ҳалок бўлгани хабар қилинган эди.
