Germaniyalik haydovchilar arzon yonilg‘i uchun Polshaga bormoqda

Germaniyada yonilg‘i narxlarining rekord darajada oshishi fonida nemis haydovchilari avtomobillarini arzonroq narxda to‘ldirish maqsadida qo‘shni Polshaga yo‘l olmoqda. Bu haqda Point nashri xabar berdi. 

 

Ma’lum qilinishicha, 3-aprel kuni ertalab Germaniya bilan chegaradosh Svinouyse shahrida joylashgan yonilg‘i quyish shoxobchalarida katta navbatlar yuzaga kelgan. Navbatda turgan avtomobillarning aksariyatini Germaniya davlat raqamiga ega mashinalar tashkil etgan.

 

Ayniqsa, bir-biriga yaqin joylashgan uchta shoxobcha atrofida tirbandlik kuchaygan. Vaziyatni nazoratga olish maqsadida shahar ma’muriyati vaqtincha harakatni tartibga solish choralarini joriy etgan.

 

Rasmiylar bu holatni Polshadagi yonilg‘i narxlarining Germaniyaga nisbatan arzonligi bilan izohlamoqda. Shahar ma’muriyati vakillari yuzaga kelgan vaziyatni “benzin turizmi” sifatida baholamoqda.

 

Mutasaddilar talabning yanada ortishi ehtimolini hisobga olib, yonilg‘i ta’minotida uzilishlar yuzaga kelishining oldini olish choralarini ham ko‘rmoqda. 

 

Xususan, Pasxa bayrami kunlari davomida qo‘shimcha yonilg‘ini tankerlar orqali yetkazib berish uchun Dengiz boshqarmasidan maxsus ruxsat so‘ralgan. Hududning geografik xususiyatlari sababli yonilg‘i yetkazib berish asosan dengiz orqali amalga oshiriladi, biroq odatdagi qoidalarga ko‘ra bayram kunlari bunday tashuvlarga ruxsat berilmaydi.

 

Ma’lumotlarga ko‘ra, Polshada hukumat tomonidan joriy etilgan maxsus choralar doirasida yonilg‘i uchun maksimal narx har kuni belgilanadi. 3-aprel holatiga ko‘ra, A-95 benzini narxi 6,19 zlotiy (taxminan 1,45 yevro), dizel yoqilg‘isi esa 7,64 zlotiy (1,8 yevro)ni tashkil etgan. 

 

Bu ko‘rsatkichlar Germaniyadagiga nisbatan ancha past bo‘lib, aynan shu tafovut haydovchilar oqimini kuchaytirayotgan asosiy omil sifatida qayd etilmoqda.

 

Avvalroq ayrim Yevropa davlatlari vahima va “yonilg‘i turizmi”ni oldini olish maqsadida qat’iy kunlik normalarni belgilayotgani haqda xabar bergandik.