Biz g‘alaba qozondik — Eron

AQSH va Eron urushni 2 haftaga to‘xtatish bo‘yicha sulhga erishdi. Kelishuvdan so‘ng har ikki tomon ham o‘zlarining g‘alabaga erishganini ma’lum qildi.

 

AQSH Prezidenti AFP agentligiga bergan telefon orqali intervyusida ikki haftalik o‘t ochishni to‘xtatish va Ho‘rmuz bo‘g‘ozining shu muddatga ochilishini Vashington uchun "to‘liq va mutlaq g‘alaba" deb e’lon qildi. Uning so‘zlariga ko‘ra, bu "shubhasiz 100 foizlik g‘alabadir".

 

Shu o‘rinda Eron Milliy xavfsizlik oliy kengashi rasmiy bayonot berib, mamlakat aholisini erishilgan g‘alaba bilan tabrikladi. Bayonotda ta’kidlanishicha, g‘alaba to‘liq tasdiq topmagunicha, mas’ullar tomonidan oqilona siyosat yuritilishi, shuningdek, jamiyatda birlik va hamjihatlikni saqlash muhim ahamiyatga ega.

 

Shuningdek, Eronning tabiiy boyliklari haqidagi savolga Tramp: "Bu eng ma'qul shaklda hal qilinadi, aks holda men kelishuvga rozi bo‘lmagan bo‘lardim", — deb javob berdi.

 

Eron Milliy xavfsizlik oliy kengashiga ko‘ra, AQSH bir qator masalalar bo‘yicha majburiyatlarni qabul qilgan. Ular qatoriga tajovuz qilmaslik, Eronning Hormuz bo‘g‘ozi ustidan nazoratini saqlab qolish, uranni boyitishni tan olish, barcha turdagi sanksiyalarni bekor qilish, xalqaro rezolyutsiyalarni tugatish, yetkazilgan zararlarni qoplash, AQSH harbiy kuchlarini mintaqadan olib chiqish hamda turli frontlarda harbiy harakatlarni to‘xtatish kiradi.

 

Eron davlat ommaviy axborot vositalariga ko‘ra, Tehronning 10 bandlik taklifi Islom Respublikasiga uranni boyitish huquqi berilishini nazarda tutadi.

 

Tramp Xitoy Eronga kelishuv tuzish uchun bosim o‘tkazganini aytdi. Xitoy Eron neftining asosiy xaridori hisoblanadi. AFP’ning eslatishicha, Tramp may oyida Pekinga tashrif buyurishni rejalashtirgan.

 

Donald Tramp Eron bilan muzokaralar 15 band bo‘yicha olib borilayotganini va ularning aksariyati allaqachon kelishib olinganini qo‘shimcha qildi.

 

"Ko‘ramiz, endi nima bo‘ladi. Kelishuvga erisha olamizmi yoki yo‘qmi, vaqt ko‘rsatadi", — deya xulosa qildi Tramp.