АҚШ ва Эрон икки ҳафталик сулҳга эришди
Эрон сулҳ вақтида Ҳўрмуз бўғозида кемалар ҳаракати таъминланишини билдирди.
АҚШ ва Эрон икки ҳафталик ўт очишни тўхтатиш бўйича келишувга эришди. Бу ҳақда АҚШ президенти Доналд Трамп маълум қилди.
CNN маълумотига кўра, сулҳ эълон қилинганига қарамай, Форс кўрфази минтақаси ҳамда Исроил ҳудудларида ракета ҳужумлари қайд этилган. АҚШ ҳарбийлари Эронга қарши зарбаларни вақтинча тўхтатган.
Аввалроқ Оқ уй юқори мартабали расмийси CNN телеканалига: “Исроил ҳам сулҳга алоқадор ва музокаралар давом этар экан, бомбардимон кампаниясини тўхтатишга ҳам рози бўлди” — деган.
Эрон ташқи ишлар вазирининг баёнотига кўра, сулҳ давомида мамлакат ҳарбийлари стратегик аҳамиятга эга бўлган Ҳўрмуз бўғози орқали кемалар ҳаракатини мувофиқлаштиради. АҚШ президенти ушбу бўғознинг қайта очилиши келишувнинг асосий шартларидан бири бўлганини таъкидлади.
Шунингдек, Покистон бош вазири Эрон ва АҚШ делегацияларини жума куни Исломободда музокаралар ўтказишга таклиф қилган. Аввалроқ Покистон томони дипломатик жараёнларга имкон яратиш мақсадида икки ҳафталик сулҳ ташаббуси билан чиққан эди.
Трамп Эрон томонидан таклиф қилинган 10 бандлик режани музокаралар олиб бориш учун амалий асос деб ҳисобланишини қўшимча қилди.
