Eron urushining 2 haftaga to‘xtagani fonida neft narxlari pasaydi

AQSH prezidenti Donald Tramp tomonidan Eron bilan ikki haftalik sulh e’lon qilinishi ortidan jahon moliya bozorlarida keskin ijobiy o‘zgarishlar kuzatildi. Bu haqda Al Jazeera xabar berdi.

 

Neft narxlari tushib ketdi, aksiyalar qimmatlashdi va obligatsiyalar bozorida o‘sish qayd etildi.

 

Avval xabar qilganimizdek, AQSH Eronga qarshi harbiy harakatlarni ikki haftaga to‘xtatishga rozi bo‘lgan. Shu bilan birga, tomonlar o‘rtasida uzoq muddatli tinchlik kelishuvi bo‘yicha muzokaralar davom etmoqda.

 

Eron rasmiylari esa, agar mamlakatga qarshi hujumlar to‘xtatilsa, o‘z hujumlarini ham to‘xtatishini bildirgan. Shuningdek, ikki hafta davomida Ho‘rmuz bo‘g‘ozi orqali kemalarning xavfsiz harakati Eron Qurolli kuchlari bilan muvofiqlashtirilishi ma’lum qilingan.

 

Fevral oyi oxirida AQSH va Isroil tomonidan Eronga berilgan zarbalardan so‘ng jahon bozorlarida beqarorlik kuchaygan edi. Bu esa jahon neft va gaz ta’minotining katta qismi o‘tadigan Ho‘rmuz bo‘g‘ozining amaliy yopilishiga sabab bo‘lgan.

 

So‘nggi ma’lumotlarga ko‘ra, otashkesim e’lon qilingach, AQSH nefti fyucherslari qariyb 16,5 foizga tushib, barreli 94 dollar atrofida savdo qilinmoqda. Shu bilan birga, S&P 500 indeksi fyucherslari 2 foizdan ortiqqa oshgan, dollar esa qadrsizlangan.

 

Mutaxassislar fikricha, mazkur sulh qisqa muddatli bo‘lsa-da, bozorlar uchun “yengillik signali” vazifasini bajarmoqda. Ayni paytda, Osiyo fond bozorlarida ham o‘sish kutilmoqda, AQSH davlat obligatsiyalari fyucherslari esa yuqoriga qarab harakatlanmoqda.

 

Shuningdek, AQSH tomoni Erondan 10 banddan iborat taklif olganini va u muzokaralar uchun asos bo‘lishi mumkinligini bildirgan. Tomonlar uzoq muddatli kelishuvga erishishga yaqin ekani istisno qilinmayapti.

 

Tahlilchilarga ko‘ra, bu jarayon ijobiy boshlanish bo‘lsa-da, hali hal etilishi lozim bo‘lgan qator masalalar saqlanib qolmoqda.