Toshkentdagi “Askiya” bozori vaqtincha yopildi

Toshkent shahridagi “Askiya” dehqon bozori yong‘in xavfsizligi qoidalari qo‘pol ravishda buzilgani sabab vaqtincha yopildi. Bu haqda Favqulodda vaziyatlar vazirligi xabar berdi.

 

Ma’lum qilinishicha, poytaxtning bir qator bozorlarida davlat yong‘in nazorati tomonidan tekshiruvlar o‘tkazilgan. Natijada ayrim savdo obyektlarida jiddiy kamchiliklar aniqlanib, xavfsizlik talablariga javob bermagan hududlar elektr ta’minotidan vaqtincha uzilgan.

 

Xususan, Mirzo Ulug‘bek tumanidagi “Navro‘z” dehqon bozori, Bektemir tumanidagi Midstroy servis MCHJ va “Qo‘yliq” qurilish bozori, Chilonzordagi Tashkent trade center MCHJ hamda “Abu Saxiy” bozori, shuningdek Uchtepa tumanidagi “Farhod” dehqon bozori ayrim hududlarida yong‘in xavfsizligi qoidalari buzilgani aniqlangan va ayrim hududlar, kamchilik aniqlangan joylar elektr energiyasidan vaqtincha uzildi. Bundan tashqari, “O‘rikzor” savdo kompleksining to‘qqizta bloki ham elektr energiyasidan uzilgan.

 

Yakkasaroy tumanida joylashgan “Askiya” dehqon bozori esa umumiy holati xavfsizlik talablariga javob bermagani sabab to‘liq elektr ta’minotidan uzilib, faoliyati vaqtincha to‘xtatilgan.

 

Vazirlikka ko‘ra, aniqlangan kamchiliklar bartaraf etilgach, ushbu obyektlarda elektr ta’minoti tiklanadi va faoliyat qayta yo‘lga qo‘yiladi.

 

Shuningdek, qayd etilishicha, ushbu choralar tadbirkorlar faoliyatiga to‘sqinlik qilish uchun emas, balki favqulodda vaziyatlarning oldini olish hamda aholi gavjum joylarda xavfsiz muhitni ta’minlashga qaratilgan.

 

8-aprel kuni Chilonzor, Shayxontohur va Yashnobod tumanlaridagi yirik bozorlarda ham shunday tekshiruvlar o‘tkazilib, ochiq elektr simlari, nosoz jihozlar va yong‘in o‘chirish tizimlarining ishlamasligi kabi kamchiliklar aniqlangan edi. Ushbu holatlar asosida ayrim hududlar elektr ta’minotidan uzilgan.

 

Tekshiruvlar 5-aprel kuni Chilonzor tumanidagi “Beshqo‘rg‘on” bozorida yuz bergan yong‘in ortidan yanada kuchaytirilgan.