Toshkentda xodimlariga daydi topishni buyurgan IIB amaldori ishdan bo‘shatildi
U daydi topolmagan xodimlarga qarindoshi yoki o‘zini “daydi” sifatida rasmiylashtirish bo‘yicha topshiriq bergan edi.
Toshkent shahri Olmazor tumani Ichki ishlar bo‘limi (IIB) amaldori Abror Xudoyberdiyev inspektorlarga daydi topib rasmiylashtirish bo‘yicha topshiriq bergani uchun lavozimidan ozod etildi. Bu haqda 11 aprel kuni Ichki ishlar vazirligi tomonidan o‘tkazilgan matbuot anjumanida vazir o‘rinbosari Ramazon Ashropov ma’lum qildi, deya xabar bermoqda Kun.uz.
Qayd etilishicha, amaldor profilaktika inspektorlariga ko‘chadan daydi shaxslarni topib, ularga nisbatan ma’muriy bayonnoma rasmiylashtirish bo‘yicha topshiriq bergan. Holat yuzasidan o‘tkazilgan xizmat tekshiruvi yakunlariga ko‘ra, u egallab turgan lavozimidan bo‘shatilgan.
Avvalroq ijtimoiy tarmoqlarda Xudoyberdiyevning xodimlarga “daydi topib, 300 ta ma’muriy bayonnoma tuzish” rejasini belgilab bergani aks etgan audio tarqalib, keng jamoatchilik muhokamasiga sabab bo‘lgandi. Audioda u daydi topa olmagan xodimlarga o‘z qarindoshi yoki o‘zini “daydi” sifatida rasmiylashtirish bo‘yicha topshiriq bergani qayd etilgan.
