Qo‘qonga olib ketilayotgan kuchli ta’sir qiluvchi dorilar to‘xtatib qolindi
Qonunbuzarlar dorilarni Farg‘ona va Qo‘qon shaharlarida sotish bilan shug‘ullangan.
O‘zbekistonga noqonuniy o‘tkazilgan 11 650 dona “Regapen” kuchli ta’sir qiluvchi dori vositalari to‘xtatib qolindi. Bu haqda DXX xabar berdi.
Ma’lum qilinishicha, Qo‘qon shahrida yashovchi, 1994 va 2002-yillarda tug‘ilgan 2 nafar shaxs o‘zlarining tanishi bo‘lgan – Qo‘shtepa tumanida istiqomat qiluvchi fuqaroning Gentra'sida Farg‘ona tumaniga borib, qo‘shni respublikadan O'zbekistonga noqonuniy o‘tkazilgan 11 650 dona “Regapen” kuchli ta’sir qiluvchi dori vositalarini qabul qilib olgan.
So‘ngra Qo‘qon shahriga qaytib ketayotganlarida tezkor guruh tomonidan Uchko‘prik tumani hududida to‘xtatilgan vaqtlarida, ular avtomashinadan dori vositalarini uloqtirib, voqea joyidan qochmoqchi bo‘lgan. Lekin, to‘xtatib qolingan.
Xabarga ko‘ra, qonunbuzarlar bu turdagi dorilarni Farg‘ona va Qo‘qon shaharlarida yashovchi shaxslarga sotish bilan shug‘ullanib kelgan.
Hozirda ularga nisbatan jinoyat ishi qo‘zg‘atilib, tergov harakatlari olib borilmoqda.
