Tadbirkorlar jarimaning 50 foizini 1 oy ichida to'lasa, qolgan qismi bekor qilinadi
Prezident Shavkat Mirziyoyev moliyaviy jarimalar tizimini takomillashtirish bo‘yicha takliflarni ko‘rib chiqdi.
Shavkat Mirziyoyev 13-aprel kuni tadbirkorlik subyektlariga nisbatan moliyaviy jarimalarni qo‘llash tartibini liberallashtirish, byurokratik to‘siqlarni qisqartirish hamda davlat organlari va mansabdor shaxslar faoliyati ustidan sud nazoratini kuchaytirishga qaratilgan takliflar taqdimoti bilan tanishdi.
Taqdimotda ta’kidlanishicha, amaldagi amaliyotda moliyaviy jarimalarni qo‘llash jarayonida tadbirkorlar uchun ayrim murakkabliklar saqlanib qolmoqda. Shu bois jarayonni soddalashtirish va sud nazoratini kuchaytirish bo‘yicha yangi mexanizmlar taklif etildi.
Xususan, 2026-yil 1-oktabrdan boshlab moliyaviy jarimalarni ixtiyoriy to‘lashni rag‘batlantiruvchi yagona tartib joriy etish rejalashtirilmoqda. Unga ko‘ra, tadbirkorlik subyekti vakolatli organ qarori topshirilganidan so‘ng bir oy ichida jarimaning 50 foizini to‘lasa, qolgan qismidan ozod etilishi nazarda tutilgan.
Shuningdek, jarimalarni olti oy davomida teng ulushlarda bo‘lib-bo‘lib to‘lash tizimi joriy etilishi ko‘zda tutilmoqda. Bunda dastlabki bir oy ichida summaning oltidan bir qismi to‘lansa, mazkur tartib avtomatik amal qiladi.
Sud nazoratini kuchaytirish doirasida vakolatli organ qarori sud tomonidan bekor qilingan taqdirda undirilgan mablag‘larni 15 kun ichida qaytarish, kechiktirilgan holatlarda esa Markaziy bank asosiy stavkasi asosida foiz hisoblash mexanizmi joriy etilishi taklif qilindi.
Jarimalarni raqamlashtirish maqsadida “Yagona davlat nazorati” axborot tizimida elektron reyestrni joriy etish, qarorlarni elektron raqamli imzo bilan tasdiqlash hamda mobil ilova orqali onlayn to‘lov va monitoring tizimini yo‘lga qo‘yish rejalashtirilmoqda.
Shuningdek, tadbirkorlar shaxsiy kabineti orqali onlayn shikoyat berish va shikoyat yuborilishi bilan qaror ijrosini avtomatik to‘xtatish imkoniyati yaratish nazarda tutilmoqda.
Davlat rahbari tadbirkorlar huquqlarini ishonchli himoya qilish, adolat va shaffoflikni ta’minlash hamda huquqiy mexanizmlarni yanada takomillashtirish bo‘yicha mutasaddilarga topshiriqlar berdi.
