Erondan uch nafar O‘zbekiston fuqarosi evakuatsiya qilindi
Rossiya tomonidan keskin vaziyat fonida 600 dan ortiq xorijlik Eron hududidan olib chiqilgan.
Eronda yuzaga kelgan keskin vaziyat fonida Rossiya tomonidan keng ko‘lamli evakuatsiya tadbiri amalga oshirildi. Ushbu jarayon doirasida jami 632 nafar shaxs xavfsiz hududlarga olib chiqilgan. Bu haqda Ria novosti xabar berdi.
Evakuatsiya qilinganlar orasida turli mamlakatlar fuqarolari, jumladan O‘zbekiston fuqarolari ham bor. Xususan, uch nafar o‘zbekistonlik uyushgan guruhlar tarkibida mamlakat hududidan olib chiqilgan.
Ma’lum qilinishicha, evakuatsiya kuchli bombardimon va raketa zarbalari fonida tashkil etilgan. Jarayon davomida to‘rtta maxsus parvoz orqali fuqarolarning jangovar hududdan xavfsiz chiqib ketishi ta’minlangan.
Evakuatsiya qilinganlar orasida Bushehr atom elektr stansiyasi xodimlari va ularning oila a’zolari ham bor. Shuningdek, 81 nafar Belarus, 27 nafar Tojikiston fuqarolari, shuningdek Armaniston, Qozogʻiston va Ukraina fuqarolari ham evakuatsiya qilingan.
Rasmiylarga ko‘ra, evakuatsiya jarayoni mintaqadagi xavfsizlik vaziyatidan kelib chiqib amalga oshirilgan bo‘lib, fuqarolarning hayoti va sog‘lig‘ini himoya qilish ustuvor vazifa sifatida belgilangan.
