Rossiya Xitoyga energetika sohasida yordam berishga tayyor — Rossiya TIV
Sergey Lavrov ikki davlat tashqi bosimlardan mustaqil ravishda energetika sohasida hamkorlikni chuqurlashtirish imkoniga egaligini bildirdi.
Rossiya Xitoyga energiya yetkazib berishni oshirishga tayyor. Bu haqda Rossiya tashqi ishlar vaziri Sergey Lavrov chorshanba kuni Pekinda o‘tkazilgan matbuot anjumanida ma’lum qildi.
Rossiya axborot agentliklari Lavrovning so‘zlariga tayanib, Rossiya prezidenti Vladimir Putinning Xitoyga kutilayotgan tashrifi yilning birinchi yarmida bo‘lib o‘tishini bildirgan. “Vedomosti” gazetasi esa manbalariga tayanib, ushbu tashrif 18-maydan boshlanadigan hafta davomida amalga oshirilishini yozgan.
Xitoy rahbari Si Jinpin chorshanba kuni Lavrov bilan uchrashib, Moskvaga nisbatan do‘stona munosabatni tasdiqladi va Xitoy hamda Rossiya o‘zaro ishonchni mustahkamlashi, hamkorlikni chuqurlashtirishi hamda bir-birining manfaatlarini himoya qilishi zarurligini ta’kidladi.
Bundan tashqari, AQSh prezidenti Donald Tramp ham sakkiz yil ichidagi ilk Xitoy tashrifi doirasida 14–15-may kunlari Si Jinpin bilan uchrashishi rejalashtirilgan.
Lavrovning aytishicha, Rossiya Yaqin Sharqdagi inqiroz oqibatida yuzaga kelgan energiya taqchilligini qoplash uchun Xitoy va boshqa davlatlarga qo‘shimcha energiya yetkazib berishni ta’minlashga tayyor.
“Rossiya Xitoy va biz bilan teng hamda o‘zaro manfaatli asosda hamkorlik qilayotgan boshqa davlatlar duch kelayotgan resurs yetishmovchiligini qoplab bera oladi”, — dedi vazir.
U, shuningdek, Rossiya va Xitoy AQShning Yaqin Sharqdagi mojarolar orqali global energiya bozorlariga ta’sir o‘tkazishga qaratilgan harakatlariga qaram bo‘lib qolmaslik uchun yetarli imkoniyatlarga ega ekanini ta’kidladi.
Lavrovga ko‘ra, mavjud, zaxira va rejalashtirilgan quvvatlar bunday bosimlardan qochish imkonini beradi va bu global iqtisodiyotga salbiy ta’sir ko‘rsatadigan omillardan biri hisoblanadi.
