Toshkentda metro poyezdi eshiklari ochiq holda harakatlandi
Holat yuzasidan rasmiy munosabat bildirildi.
Ijtimoiy tarmoqlarda metro poyezdi vagoni eshigi ochiq holda harakatlangani aks etgan video tarqaldi. Mazkur holat bo‘yicha “Toshkent metropoliteni” rasmiy munosabat bildirdi.
Ma’lum qilinishicha, 14-aprel kuni soat taxminan 12:53 da “Alisher Navoiy” metro bekatidan harakatlanishi rejalashtirilgan 34-sonli harakat tarkibida yo‘lovchilar qabul qilingandan so‘ng mashinist Sh.A. Abilkasimov tomonidan eshiklarni yopish buyrug‘i berilganiga qaramasdan, uchinchi vagonning birinchi eshigi to‘liq yopilmagan.
Shunga qaramay, mashinist “O‘zbekiston” metro bekati tomon harakatni davom ettirgan. Harakat xavfsizligini ta’minlash maqsadida poyezd bekatda to‘xtatilib, yo‘lovchilar tushirilgan hamda harakat tarkibi texnik ko‘rik yo‘lagiga olib ketilgan.
Holat yuzasidan xizmat tekshiruvi o‘tkazilib, mashinist Sh.A. Abilkasimovga nisbatan qat’iy intizomiy chora ko‘rilishi belgilangan.
“Toshkent metropoliteni” DUK tomonidan yo‘lovchilar xavfsizligini ta’minlash ustuvor vazifa hisoblanashini va bunday holatlarning oldini olish bo‘yicha qo‘shimcha nazorat choralari kuchaytirilayotganini ta’kidlab, keltirilgan noqulayliklar uchun yo‘lovchilardan uzr so‘radi.
