Pentagon Eronga qarshi yangi operatsiya boshladi
Bu operatsiya “Epik g‘azab”ning kengaytirilgan bosqichi ekani aytilmoqda.
AQSh Mudofaa vazirligi Eron Islom Respublikasiga qarshi yangi bosim choralari doirasida “Iqtisodiy g‘azab” nomli operatsiya boshlanganini ma’lum qildi.
AQSh mudofaa vaziri Pet Hegsetnining aytishicha, ushbu tashabbus Tehronga maksimal iqtisodiy bosim o‘tkazish orqali uni “to‘g‘ri qaror” qabul qilishga undashga qaratilgan. U Vashington muzokaralarni afzal ko‘rishini, biroq zarurat tug‘ilsa, qat’iy variantlar ham istisno emasligini ta’kidladi.
Hegset, shuningdek, AQSh harbiylari avval ham yirik jangovar operatsiyalardan global blokada va bosim tizimiga o‘tganini, bu tajriba tez va yanada kuchli shaklda qayta qo‘llanishi mumkinligini qayd etdi.
Uning so‘zlariga ko‘ra, Prezident Donald Tramp topshirig‘iga binoan Vashington Eronning yadro quroliga ega bo‘lishiga yo‘l qo‘ymaslik siyosatini davom ettiradi.
AQSh Moliya vazirligi ham operatsiya doirasida choralarni kuchaytirishini bildirdi. Skott Bessentning qayd etishicha, Vashington “Iqtisodiy g‘azab” doirasida barcha mavjud iqtisodiy vositalardan foydalanadi va Eronni qo‘llab-quvvatlayotgan tuzilmalarga qarshi bosim yanada kuchaytiriladi. Moliya vazirligi rasmiylari bu jarayon “maksimal iqtisodiy bosim strategiyasi”ning bir qismi ekanini ta’kidlamoqda.
Rasmiy ma’lumotlarda operatsiya avvalroq “Epik g‘azab” nomi bilan ham tilga olingan tashabbusning kengaytirilgan bosqichi ekani aytiladi. AQSh tomoni Eronni muzokara stoliga qaytarish uchun bosim va diplomatiya parallel ravishda davom etishini bildirgan.
Avvalroq AQSh Eron bilan bog‘liq ayrim mintaqaviy cheklovlarni kuchaytirgani, jumladan dengiz yo‘nalishlarida nazorat va bosim choralarini kengaytirgani haqida ham xabarlar tarqalgan edi.
Rasmiylar ushbu siyosat Eronning mintaqaviy ta’sirini cheklash va xavfsizlik tahdidlariga javob berishga qaratilganini aytmoqda.
Hozircha Eron tomoni “Iqtisodiy g‘azab” operatsiyasiga rasmiy munosabat bildirgani yo‘q.
Tahlilchilarga ko‘ra, yangi bosim kampaniyasi Vashington va Tehron o‘rtasidagi allaqachon keskin bo‘lgan munosabatlarni yanada murakkablashtirishi mumkin.
