AQSh Hormuz bo‘g‘ozi yaqinida Eron kemasini qo‘lga oldi
Tehron bu holatni qaroqchilik deb atab, javob qaytarishini ma’lum qildi.
AQSh prezidenti Donald Tramp Hormuz bo‘g‘ozi yaqinida Eron bayrog‘i ostidagi yuk kemasi qo‘lga olinganini ma’lum qildi.
Rasmiy Vashingtonga ko‘ra, kema AQSh tomonidan joriy etilgan dengiz blokadasini buzib o‘tishga uringan.
Trampning bildirishicha, "Touska" nomli kema Ummon qo‘ltig‘ida AQSh Harbiy-dengiz kuchlari esminetsi tomonidan to‘xtashga chaqirilgan, biroq ekipaj buyruqqa bo‘ysunmagan. Shundan so‘ng kema dvigatel qismi zararlangan va AQSh dengiz piyodalari tomonidan nazoratga olingan. Hozirda kema borti tekshirilmoqda.
AQSh Markaziy qo‘mondonligi ma’lumotiga ko‘ra, kema Eronning Bandar-Abbos portiga yo‘l olgan bo‘lib, olti soat davomida berilgan ogohlantirishlarga amal qilmagan.
Eron tomoni esa voqeani keskin qoraladi. Mamlakatning oliy harbiy qo‘mondonligi AQShni avval erishilgan sulhni buzishda ayblab, bu harakatni “qurolli dengiz bosqinchiligi” deb atadi. Xotam al-Anbiya qo‘mondonligi vakiliga ko‘ra, Tehron yaqin orada javob choralarini ko‘radi.
Mazkur hodisa Hormuz bo‘g‘ozi atrofidagi keskin vaziyat fonida yuz bermoqda. Ushbu hudud orqali dunyo neftining qariyb beshdan bir qismi tashiladi.
AQSh 13-apreldan buyon Eron portlariga yo‘nalgan kemalarga nisbatan blokada joriy qilgan.
Eron parlamenti spikeri Muhammad Bag‘er G‘olibaf blokada bekor qilinmaguncha bo‘g‘oz orqali erkin harakat bo‘lmasligini ta’kidladi.
Avvalroq Eron Livandagi Hizbulloh bilan bog‘liq hududdagi 10 kunlik sulh fonida bo‘g‘oz qayta ochilganini bildirgan edi. Biroq AQSh blokadasi saqlanib qolayotgani sababli cheklovlar davom etmoqda.
Shu bilan birga, AQSh muzokarachilarining Islomobodda Eron bilan ehtimoliy muzokaralar o‘tkazishi kutilmoqda. Bu esa qisqa muddatli sulhni uzaytirish ehtimolini oshirgandi. Biroq Eron davlat OAVlari Tehron muzokaralarning navbatdagi bosqichiga hali rozilik bermaganini yozmoqda.
