Isroil o‘z maqsadlariga erishmaguncha to‘xtamaydi — Netanyaxu
Isroil Bosh vaziri mintaqada istalgan vaqtda yangi voqealar yuz berishi mumkinligini ta'kidladi.
Isroil Bosh vaziri Benyamin Netanyaxu Eron bilan bog‘liq qarama-qarshilik hali yakunlanmaganini va yaqin kunlarda vaziyatda yangi o‘zgarishlar yuz berishi mumkinligini ma’lum qildi.
U bu bayonotni Quddus shahrida Argentina prezidenti Xaver Miley bilan bo‘lib o‘tgan uchrashuv va qo‘shma matbuot anjumani davomida bildirgan deydi Tass.
Netanyaxuning so‘zlariga ko‘ra, Isroil mintaqadagi xavfsizlik tahdidlariga qarshi kurashni davom ettiradi hamda o‘z strategik maqsadlariga erishishga qat’iy bel bog‘lagan.
“Biz ko‘plab natijalarga erishdik. Biroq bu hali yakun emas. Har qanday vaqtda yangi o‘zgarishlar yuz berishi mumkin”, dedi Isroil bosh vaziri.
Shuningdek, u Eron bilan qarama-qarshilikni “jiddiy qiyinchiliklar va katta oqibatlar davri” deb baholadi. Netanyaxu Isroil bu jarayonda AQSh bilan yaqin hamkorlik qilayotganini, ikki davlat o‘rtasidagi strategik aloqalar davom etishini ta’kidlagan.
Bosh vazir o‘z nutqida Argentina prezidenti Xaver Mileyning Isroilga tashriflarini ham tilga olib, har safar uning safari muhim voqealar arafasiga to‘g‘ri kelayotganini qayd etgan.
“Ertaga yoki undan keyin nima bo‘lishini hech kim aniq bilmaydi. Ammo biz o‘z maqsadlarimizga erishamiz”, dedi Netanyaxu.
Uning fikricha, Isroilning qat’iy pozitsiyasi va AQSh bilan hamkorligi mamlakat manfaatlarini himoya qilishda muhim rol o‘ynaydi.
Eslatib o‘tamiz, so‘nggi oylar davomida AQSh, Isroil va Eron o‘rtasidagi ziddiyatlar keskinlashgan edi. Avvalroq Vashington va Tehron o‘rtasida bir muzokaralar o‘tkazilgan, biroq tomonlar uzoq muddatli siyosiy kelishuvga erisha olmagani xabar qilingan edi.
