“Prezidentning murojaatini yetkazish men uchun katta sharaf bo‘ldi” — Saida Mirziyoyeva
Samarqandda narkotahdidlarga qarshi o‘tkazilayotgan forumda xalqaro tashkilotlar rahbarlari “Narkotiklarga qarshi kurashish fidoyisi” ko‘krak nishoni bilan taqdirlandi.
Bugun Samarqand shahrida “Jamoat salomatligi va xavfsizligini ta’minlash maqsadida transmilliy narkotahdidlarga qarshi kurashish” mavzusidagi xalqaro forum o‘z ishini boshladi.
Mazkur forumda Prezident administratsiyasi rahbari Saida Mirziyoyeva O‘zbekiston Prezidentining ishtirokchilarga yo‘llagan murojaatini o‘qib eshittirdi.
“Forum ishtirokchilariga — 50 dan ortiq davlat vakillari, 500 dan ziyod xalqaro ekspert va mutaxassislar, shuningdek, BMT, Interpol, Yevropa Ittifoqi, MDH va SHHT kabi yetakchi xalqaro tashkilotlar delegatlariga O‘zbekiston Respublikasi Prezidenti Shavkat Mirziyoyevning murojaatini yetkazish men uchun katta sharaf bo‘ldi”, deya yozdi Saida Mirziyoyeva.
Ma’lum qilinishicha, ushbu sohadagi hamkorlikni rivojlantirishga qo‘shgan hissasi uchun qator xalqaro tashkilotlar rahbarlari maxsus ta’sis etilgan “Narkotiklarga qarshi kurashish fidoyisi” ko‘krak nishoni bilan taqdirlandi.
