Germaniya hukumati Rossiyani o‘z hududidagi obyektlarga "to‘g‘ridan-to‘g‘ri tahdid" qilishda ayblamoqda
Rossiya Ukrainaga dron yetkazib beradigan Germaniyadagi korxonalarning joylashuvi va faoliyati haqida ochiq ma’lumot bergan.
Germaniya hukumati Rossiyaning Berlindagi elchisini Tashqi ishlar vazirligiga chaqirtirib, Germaniyadagi obyektlarga nisbatan “to‘g‘ridan-to‘g‘ri tahdid” qiladigan bayonotlarni keskin qoraladi. Bu haqda Al Jazeera yozmoqda.
Ma'lum qilinishicha, o‘tgan hafta Rossiya Mudofaa vazirligi Ukraina mudofaa sanoati bilan bog‘liq deb hisoblangan 21 ta kompaniya ro‘yxatini e’lon qilgan edi. Ular orasida Germaniyaning kamida uchta kompaniyasi ham tilga olingan bo‘lib, ularning Ukraina uchun dron (UAV) yetkazib berishda ishtirok etayotgani qayd etilgan.
Rossiya tomoni ushbu korxonalarning joylashuvi va faoliyati haqida ochiq ma’lumot bergan.Vazirlik xabarida o‘sha joylar nishonga olinishi mumkinligi haqidagi noaniq taklif mavjud edi.
“Yevropa jamoatchiligi nafaqat o‘z xavfsizligiga tahdidlarning asl sabablarini aniq tushunishi, balki o‘z mamlakatlarida Ukraina uchun uchuvchisiz uchish apparatlari (UAV) va ularning butlovchi qismlarini ishlab chiqarayotgan ukrain hamda ‘qo‘shma’ korxonalarning manzillari va joylashuvini ham bilishi kerak”, — deya yozgan Rossiya Mudofaa vazirligi.
Germaniya Tashqi ishlar vazirligi ma’lumotiga ko‘ra, ushbu tahdidlar Ukrainani qo‘llab-quvvatlashga qaratilgan siyosatni zaiflashtirish va Yevropa ittifoqining birligini sinovdan o‘tkazishga urinish sifatida baholanmoqda.
“Bizni qo‘rqitib bo‘lmaydi. Germaniyada har qanday tahdid va josuslik faoliyati mutlaqo qabul qilib bo‘lmaydi”, — deyiladi vazirlik bayonotida.
Rossiya elchixonasi hozircha mazkur masalaga izoh bermagan.
Shuningdek, Germaniya va Ukraina strategik mudofaa hamkorligini kuchaytirishga kelishib olgan. Kelishuv doirasida havo mudofaasini mustahkamlash va dron ishlab chiqarish sohasida hamkorlikni kengaytirish ko‘zda tutilgan.
Tomonlar qo‘shma bayonotda havo mudofaasi bo‘yicha hamkorlikni chuqurlashtirish, shuningdek Ukraina dron sanoatini qo‘llab-quvvatlash va qo‘shma ishlab chiqarish loyihalarini rivojlantirishni rejalashtirganini bildirgan.
Dushanba kuni Rossiya xavfsizlik idoralari Germaniya fuqarosi bo‘lgan ayolni hibsga oldi. Rossiya Federal xavfsizlik xizmati (FSB) ma’lumotiga ko‘ra, u Kavkazdagi Pyatigorsk shahrida portlovchi qurilma bilan qo‘lga olingan va Ukraina bilan bog‘liq ehtimoliy reja doirasida harakat qilganlikda gumon qilinmoqda.
Germaniya Tashqi ishlar vazirligi bu hodisalardan xabardor ekanini, biroq shaxsiy ma’lumotlar va tergov jarayoni sababli qo‘shimcha izoh bermasligini bildirdi.
