Solovyov Italiya bosh vazirini haqorat qildi

Italiya Rossiyaning mamlakatdagi elchisini Bosh vazir Jorja Meloniga nisbatan aytilgan haqoratli so‘zlar yuzasidan norozilik bildirish uchun chaqirtirdi. Bu haqda Italiya tashqi ishlar vaziri Antonio Tajaniga tayanib, Reuters xabar berdi.

 

“Men Rossiya elchisini Tashqi ishlar vazirligiga chaqirtirdim va Rossiya televideniyesida boshlovchi Vladimir Solovyev tomonidan aytilgan o‘ta jiddiy va haqoratli bayonotlar yuzasidan rasmiy norozilik bildirdim”, — deb yozdi Tajani X ijtimoiy tarmog‘ida.

 

Qayd etilishicha, bir daqiqalik lavhada Solovyev italyan tilida so‘kinib, Melonini “o‘ta ketgan ahmoq” va undan ham og‘irroq so‘zlar bilan haqorat qilgan. 

 

Shuningdek, u rus tilida Melonini “saylovchilarga butunlay boshqa narsalarni va’da qilgan holda ularga xiyonat qilgan fashist chiqindi” deb atagan.

 

Solovyev yana shunday degan: “Xiyonat — uning ismlaridan biri. U avval sodiqlik bildirgan Donald Trampni ham sotdi.”

 

Meloni Ukrainaga Rossiya bosqinidan beri harbiy va fuqarolik yordami ko‘rsatib kelayotgan o‘ng qanot hukumatiga rahbarlik qiladi. Biroq uning koalitsiyasiga Kreml bilan yaqin aloqalari bo‘lgan “Liga” partiyasi ham kiradi.

 

So‘nggi paytlarda Meloni avval yaqin ittifoqchi bo‘lgan Tramp bilan munosabatlarini sovutgan. U Eron bilan bog‘liq mojaro masalasida masofa saqlab, AQSh prezidentining Papa Leoga nisbatan keskin tanqidlariga ochiq e’tiroz bildirgan.

 

Bu holat Vladimir Solovyev tomonidan xorijiy yetakchilar va boshqa davlatlarga nisbatan yangrayotgan ilk keskin bayonot emas. U joriy yil yanvar oyida Rossiyani Markaziy Osiyo va Armanistonda “maxsus harbiy amaliyot” o‘tkazishga chaqirgan edi.

 

O‘shanda u Armaniston hamda Markaziy Osiyo Rossiya uchun Suriya yoki Venesueladan ham muhimroq ekanini ta’kidlab, ushbu hududlarni yo‘qotish katta muammolarga olib kelishini bildirgan. Shuningdek, u Markaziy Osiyo mintaqasini “bizning Osiyo” deb atagan.