Turkiyadagi maktabda 9 kishini o‘ldirgan o‘quvchining onasi ham hibsga olindi

Turkiyaning Qahramonmarash viloyatida maktabga qurolli hujum uyushtirgan 14 yoshli Iso Aras Mersinlining onasi Peyman Pinar Mersinli hibsga olindi. Bu haqda Qahramonmarash Respublika bosh prokuraturasi ma’lum qildi, deya xabar bermoqda "Oksijen" nashri.

 

Tergov ma’lumotlariga ko‘ra, 15-aprel kuni Ayser Chalik o‘rta maktabida sodir etilgan hujum natijasida 1 nafar o‘qituvchi va 8 nafar o‘quvchi halok bo‘lgan. Gumonlanuvchi hujumni otasiga tegishli bo‘lgan 5 ta o‘qotar qurol va 7 ta o‘qdon bilan amalga oshirgan. Mersinlining o‘zi pichoqlanish oqibatida halok bo‘lgan.

 

Mazkur jinoyat ishi doirasida avval gumonlanuvchining otasi, politsiya bosh inspektori Uygur Mersinli 16-aprel kuni hibsga olingan edi. Onasi Peyman Pinar Mersinli esa dastlab qo‘yib yuborilgan, biroq keyinchalik unga nisbatan qaytadan qo‘lga olish qarori chiqarildi.

 

Ma’lum qilinishicha, u Elazig‘ shahrida hibsda saqlanayotgan turmush o‘rtog‘ini ko‘rib qaytib kelayotgan vaqtda qo‘lga olingan. Sud qaroriga ko‘ra, u “ehtiyotsizlik oqibatida o‘limga sabab bo‘lish” aybi bilan hibsga olindi.

 

Bosh prokuratura bayonotida qayd etilishicha, tergov davomida hujum uyushtirgan bolaning sog‘ligiga oid barcha tibbiy ma’lumotlar o‘rganilgan. Unga ko‘ra, voqeadan oldin ikki turli muassasada ishlovchi psixologlar o‘smirning bolalar psixiatri ko‘rigidan o‘tishi va davolanishi zarurligini ta’kidlagan.

 

Shunga qaramasdan, onasi mazkur tavsiyalarni inobatga olmagan va farzandini psixiatriya muassasasiga olib bormagan. Tergov organlari bu holatni bolaning ruhiy holati bo‘yicha zarur choralar ko‘rilmagani, natijada og‘ir oqibatlarga olib kelgan beparvolik sifatida baholamoqda.

 

Hozirda mazkur ish bo‘yicha tergov harakatlari davom etmoqda.

 

Eslatib o‘tamiz, 14-aprel kuni Shonliurfa viloyati Siverek tumanida joylashgan litseyda qurolli hujum sodir bo‘ldi. Oqibatda 16 kishi jarohatlanib, hujum sodir etgan o‘quvchi o‘z joniga qasd qildi.

 

Turkiya Prezidenti Rajab Toyyib Erdo‘g‘an mamlakatda o‘qotar qurolga egalik qilish tartibini qat’iylashtirish va tegishli huquqiy normalarni kuchaytirish bo‘yicha yangi chora-tadbirlar joriy etilishini ma’lum qildi.