Эрдўған Туркияда қуролга эгалик қилишни чеклашини эълон қилди
Қарор мактаблардаги отишмалардан сўнг қабул қилинди.
Туркия Президенти Ражаб Тоййиб Эрдўған мамлакатда ўқотар қуролга эгалик қилиш тартибини қатъийлаштириш ва тегишли ҳуқуқий нормаларни кучайтириш бўйича янги чора-тадбирлар жорий этилишини маълум қилди.
Бу қарор сўнгги ҳафтада мактабларда содир бўлган икки алоҳида отишма ҳодисаси ортидан қабул қилинмоқда. Президент Вазирлар Маҳкамаси йиғилишидан сўнг бу борада расмий баёнот берган.
Эрдўғаннинг таъкидлашича, таълим муассасаларида хавфсизликни таъминлаш давлат сиёсатининг устувор йўналишларидан бири бўлиб қолади. Шу сабабли мактабларда хавфсизлик чораларини кучайтириш ва қуролга эгалик қилиш бўйича назоратни янада қатъийлаштириш режалаштирилган.
“Биз ўқотар қурол эгалари томонидан хавфсизлик талабларига риоя этилишини таъминлаш бўйича масъулиятни кучайтирамиз ҳамда қонунчиликка қўшимча чекловлар киритамиз,” — деди Туркия Президенти.
Шунингдек, ҳуқуқни муҳофаза қилиш органлари томонидан рақамли платформаларда тарқатилаётган ёлғон ва зарарли контентга қарши чоралар кучайтирилиши, киберхавфсизлик йўналишидаги имкониятлар кенгайтирилиши қайд этилган.
Эслатиб ўтамиз, 15 апрель куни Туркиянинг жануби-шарқидаги Қаҳраманмараш вилоятидаги мактабда юз берган отишмада тўққиз киши ҳалок бўлган ва 21 киши жароҳатланган эди. 14 апрель куни Шанлиурфа вилоятидаги мактабда ўн тўққиз киши жароҳат олгани хабар қилинган эди.
