Eron Hormuz bo‘g‘ozidan o‘tayotgan kemalardan to‘lov undirishni boshladi
Kemalardan undirilgan boj to‘lovlari hisobidan olingan ilk daromad mamlakat Markaziy banki hisobiga o‘tkazildi.
Eron parlamenti spikeri o‘rinbosari Hamidrizo Hoji Baboyi Hormuz bo‘g‘ozi orqali o‘tuvchi kemalardan undirilgan boj to‘lovlari hisobidan olingan ilk daromad mamlakat Markaziy banki hisobiga o‘tkazilganini ma’lum qildi, deya xabar bermoqda BBC.
Tasnim xabariga ko‘ra, parlament spikeri mablag‘lar qanday tartibda yig‘ilgani yoki ularni kimlar to‘lagani haqida qo‘shimcha ma’lumot bermagan. BBC esa ushbu ma’lumotni mustaqil tasdiqlay olmaganini qayd etgan.
Avvalroq, amaldagi sulh e’lon qilinishidan oldin Tehron Hormuz bo‘g‘ozi orqali harakatni “do‘st” davlatlar bilan cheklashini bildirgan hamda bu hududdan o‘tuvchi kemalardan boj undirish masalasi muhokama qilingan. Biroq o‘sha davrda to‘lov miqdori yoki umuman haq olinayotgani yuzasidan aniqlik kiritilmagan.
Xususan, mart oyi oxirlarida Eronning Hindistondagi elchixonasi Eron kemalardan bo‘g‘ozdan o‘tish uchun 2 million dollar miqdorida to‘lov undirilayotgani haqidagi da’volarni rad etgan edi.
Shu bilan birga, yana bir eronlik deputat Alirizo Salimiy manbalarga tayanib Tasnim agentligiga bergan izohida, Hormuz bo‘g‘ozi orqali o‘tgan kemalardan to‘lovlar undirilganini aytgan.
Uning ta’kidlashicha, undirilgan mablag‘ miqdori kema turi, yuk hajmi va xavf darajasiga qarab farq qiladi.
“Qoidalarni biz belgilaymiz”, — degan u.
AQSH prezidenti Donald Tramp Hormuz bo‘g‘ozi orqali o‘tish uchun Eronga to‘lov qilgan kemalarga nisbatan choralar ko‘rilishi mumkinligini bildirgan edi.
