Germaniya Rossiyani Yevropa xavfsizligiga asosiy tahdid sifatida ko‘rmoqda

Germaniya Qurolli kuchlari (Bundesver) mamlakat tarixida ilk bor harbiy strategiya va qurolli kuchlarni rivojlantirish konsepsiyasini qabul qildi. Bu haqda DW xabar berdi.

 

Ma’lum qilinishicha hujjatda Rossiya Yevropa xavfsizligi uchun asosiy tahdid sifatida qayd etilgan hamda Bundesverni Yevropadagi eng kuchli armiyaga aylantirish maqsadi belgilangan.

 

Germaniya mudofaa vaziri Boris Pistorius 22-aprel kuni Berlinda taqdim etilgan kompleks mudofaa konsepsiyasi doirasida mamlakatning o‘zgarayotgan xavfsizlik muhitiga mos yangi yondashuv ishlab chiqilganini ma’lum qildi. Hujjatning asosiy qismi maxfiy hisoblanadi.

 

Vazir Rossiya prezidenti Vladimir Putin rahbarligidagi siyosatni NATO uchun bevosita xavf sifatida baholadi. Uning ta’kidlashicha, Rossiya qayta qurollanish orqali NATO bilan harbiy qarama-qarshilikka tayyorlanmoqda va harbiy kuchni siyosiy maqsadlarda qo‘llashni odatiy vosita sifatida ko‘rmoqda.

 

Yangi strategiyaga ko‘ra, kamida 460 ming nafar nemis harbiylari ittifoqchilar bilan birgalikda Rossiyadan kelishi mumkin bo‘lgan ehtimoliy tahdidga qarshi turishga tayyor bo‘lishi kerak.

 

Hujjatda Rossiya tomonidan NATO davlatlariga, jumladan Germaniyaga qarshi gibrid tahdidlar, jumladan kiberhujumlar, dezinformatsiya, josuslik va sabotaj faoliyatlari olib borilayotgani qayd etilgan. 

 

Shu bilan birga, Rossiyaning G‘arbni dushman sifatida ko‘rishi va NATO birligini zaiflashtirishga intilayotgani ta’kidlangan.

 

Pistorius Germaniyani qisqa muddatda mudofaa qobiliyatini oshirish, o‘rta muddatda harbiy salohiyatni kengaytirish va uzoq muddatda texnologik ustunlikka erishishga yo‘naltirilganini bildirdi. Uning aytishicha, Bundesver Yevropadagi eng kuchli konvensional armiyaga aylantiriladi.

 

Strategiyada kelajak urushlarida axborot ustunligi, sun’iy intellekt, kvant texnologiyalari, robototexnika va dronlar muhim rol o‘ynashi qayd etilgan. 

 

Shuningdek, kibermakonda va kosmosda harbiy salohiyatni kuchaytirish zarurligi ta’kidlangan.

 

Hujjatga ko‘ra, kelajakdagi urushlarda front va orqa chiziq o‘rtasidagi farq yo‘qoladi hamda davlat, iqtisodiyot va fuqarolar ham tahdid ostida bo‘lishi mumkin.

 

AQSH NATOning asosiy tayanchi bo‘lsa ham, biroq Germaniya ittifoq doirasida o‘z harbiy yuklamasini oshirishi kerakligi bildirilgan. Germaniya NATOning yadro tiyib turish tizimidagi ishtirokini davom ettirishi qayd etilgan.

 

Zaxira kuchlar ham qurolli kuchlarning to‘liq qismi sifatida qayta ko‘rib chiqilib, ular zarur jihozlar bilan ta’minlanishi belgilangan.