Rossiyada milliarderlar soni va ularning boyligi rekord darajaga yetdi
Milliarderlarning umumiy boyligi 696,5 milliard dollarni tashkil etib, tarixiy maksimumga chiqqan.
Rossiyada dollar milliarderlari soni va ularning umumiy boyligi bo‘yicha yangi rekord qayd etildi. Bu haqda Forbes jurnalining rus nashri tomonidan 2026 yil uchun tuzilgan reytingda ma’lum qilindi, deya xabar bermoqda DW.
Reytingga ko‘ra, mamlakatda dollar milliarderlari soni Ukraina urushi boshlangandan keyin 26 foizga oshib, 155 nafarga yetgan. 2021 yilda esa ularning soni 123 nafarni tashkil etgan.
Milliarderlarning umumiy boyligi 696,5 milliard dollarni tashkil etib, tarixiy maksimumga chiqqan. Qayd etilishicha, urush va xalqaro sanksiyalarga qaramay, bu ko‘rsatkich bir yil ichida 11 foizga oshgan.
Joriy yilgi reytingda “Severstal” kompaniyasi rahbari Aleksey Mordashov va uning oilasi 37 milliard dollar boylik bilan birinchi o‘rinni egallagan. Forbes ma’lumotiga ko‘ra, bu Rossiya tarixida ilk bor bir shaxsning boyligi 30 milliard dollardan oshgan holatdir.
Ikkinchi o‘rinda “Nornikel” rahbari Vladimir Potanin (29,7 milliard dollar), uchinchi o‘rinda esa “Lukoyl” asoschisi Vagit Alekperov (29,5 milliard dollar) joylashgan.
Top-10 ro‘yxatidan Leonid Mixelson, Sulayman Kerimov, Vladimir Lisin, Gennadi Timchenko, Andrey Melnichenko, Mixail Fridman hamda Alisher Usmonov ham o‘rin olgan.
Shuningdek, mamlakatdagi eng boy ayol sifatida Tatyana Kim qayd etilgan bo‘lib, u 8,1 milliard dollar boylik bilan reytingda 23-o‘rinni egallagan.
