Eronga nisbatan yadroviy qurol ishlatilmaydi — Tramp

 

AQSh prezidenti Donald Tramp Eronga qarshi yadroviy qurol qo‘llash rejalashtirilmayotganini ma’lum qildi. Bu haqda Reuters xabar berdi.

 

Oq uyda jurnalistlar bilan muloqot chog‘ida davlat rahbari AQSh zarur bo‘lgan taqdirda an’anaviy harbiy vositalar orqali maqsadlariga erisha olishini ta’kidlagan. Uning so‘zlariga ko‘ra, yadroviy qurol qo‘llash zarurati mavjud emas.

 

Shuningdek, Tramp yadroviy qurol umuman qo‘llanmasligi lozimligini qayd etgan hamda bu turdagi qurollardan foydalanishga qarshi ekanini bildirgan.

 

AQSh prezidenti Eron bilan bog‘liq vaziyat yuzasidan fikr bildirib, sulh davrida Tehron ma’lum darajada harbiy salohiyatini tiklashga uringanini aytgan. Shu bilan birga, AQSh qurolli kuchlari qisqa muddatda javob choralarini ko‘rishga qodir ekanini ta’kidlagan.

 

Eron bilan ehtimoliy kelishuv masalasiga to‘xtalgan Tramp, bu borada shoshilmasligini, uzoq muddatli va barqaror natija beradigan kelishuvga erishish tarafdori ekanini bildirgan.