Saida Mirziyoyeva Samarqanddagi ta’mirtalab obyektlarni ko'zdan kechirdi
Prezident administratsiyasi rahbari joylardagi haqqoniy holatni ko‘rish uchun hududga tez-tez kelib turishini bildirdi.
Prezident administratsiyasi rahbari Saida Mirziyoyeva Samarqand viloyatiga tashrifi davomida hududdagi bir qator infratuzilma loyihalari bilan tanishdi.
Ma’lum qilinishicha, tashrif chog‘ida “Yangi O‘zbekiston” massivini rivojlantirish ishlari ko‘zdan kechirilgan. Shuningdek, musiqa maktabi kabi ta’mirga muhtoj obyektlar hamda Geologlar mahallasidagi bolalar bog‘chasi holati o‘rganilgan.
Qayd etilishicha, mazkur bog‘cha kapital ta’mirdan tashqari, tubdan qayta quriladi va rekonstruksiyadan so‘ng 600 nafargacha bolani qabul qila oladigan, Samarqanddagi eng yirik maktabgacha ta’lim muassasalaridan biriga aylanishi kutilmoqda.
Tashrif yakunida viloyat va tumanlar rahbariyati bilan uchrashuv o‘tkazilgan.
Saida Mirziyoyeva ta’kidlashicha, hududlarda amalga oshirilayotgan va rejalashtirilgan o‘zgarishlar Shavkat Mirziyoyev tomonidan olib borilayotgan tizimli islohotlarning tarkibiy qismi hisoblanadi.
“Rahbarimiz topshiriqlarining joylardagi ijrosini ta’minlashga jamoam bilan birga ko‘maklashish, haqqoniy holatni qog‘ozlardagi hisobotlarda emas, balki o‘z ko‘zim bilan ko‘rish uchun ham bu yerga tez-tez kelib turaman”, — dedi Saida Mirziyoyeva.
