Tramp Eronni “rahm-shafqat so‘rashga” chaqirdi
AQSh prezidenti Eronni muzokara va taslim bo‘lishga undab, uning iqtisodiy holatini “o‘lik” deb ta’rifladi.
AQSh prezidenti Donald Tramp Eron rahbariyatini yana bir bor “rahm-shafqat so‘rashga” chaqirdi. Oq uyda jurnalistlar bilan suhbat chog‘ida Amerika yetakchisi Eronning hozirgi holatini keskin baholab, mamlakat allaqachon harbiy va iqtisodiy jihatdan og‘ir vaziyatga tushib qolganini ta’kidlagan. Bu haqda TASS xabar berdi.
Trampning so‘zlariga ko‘ra, Eron “harbiy jihatdan mag‘lub bo‘lgan” va uning iqtisodiyoti “chuqur inqiroz holatida” ekani qayd etilgan. U bu vaziyatni “o‘lik iqtisodiyot” deb ta’riflab, Islom Respublikasi rahbariyati murosaga borishi va taslim bo‘lganini tan olishi kerakligini bildirgan.
“Endi ular rahm-shafqat so‘rashlari kerak. Ular shunchaki: ‘Biz taslim bo‘ldik’, deyishlari kerak”, — deya Trampning so‘zlaridan iqtibos keltirilgan.
AQSh prezidenti so‘nggi haftalarda ham Eron rasmiylarini bir necha bor shunga o‘xshash mazmundagi bayonotlar bilan murojaat qilib, muzokara va taslim bo‘lishga chaqirgan. Uning avvalgi chiqishlari 10-mart, 6-aprel va boshqa sanalarda ham qayd etilgan.
