Toshkent metrosida yo‘lovchi ayol relsga tushib ketdi
Mashinistning tezkor harakati sababli jiddiy oqibatlarning oldi olingan.
Toshkent metropolitenining G‘afur G‘ulom metro bekatida yo‘lovchi ayol ehtiyotsizlik oqibatida poyezd yo‘liga tushib ketdi. Bu haqda metropoliten matbuot xizmati xabar berdi.
Ma’lum qilinishicha, hodisa 2-may kuni soat 21:35 atrofida sodir bo‘lgan. Bekatga 40-sonli harakat tarkibi kirib kelayotgan paytda ayol ehtiyotsizlik bilan relsga tushib ketgan.
Mazkur vaziyatda mashinist tomonidan tezkor va aniq choralar ko‘rilib, poyezd zudlik bilan to‘xtatilgan hamda xavfsizlik talablari to‘liq ta’minlangan.
Dastlabki ma’lumotlarga ko‘ra, yo‘lovchi jiddiy tan jarohati olmagan. U tez tibbiy yordam xodimlari tomonidan ko‘rik uchun shifoxonaga olib ketilgan.
Qayd etilishicha, hodisa metro qatnovi jadvaliga ta’sir ko‘rsatmagan, poyezdlar belgilangan tartibda harakatni davom ettirgan.
