Shavkat Mirziyoyevning qarindoshi Ikkinchi jahon urushida 20 dan ortiq vermaxt askarini yo‘q qilgan — TASS
O‘runbek Yoqubov Oder daryosini kechib o‘tish vaqtida o‘z minomyotidan o‘t ochish orqali piyoda qo‘shinlarni qo‘llab-quvvatlab, platsdarmni egallashga yordam bergan.
O‘zbekiston prezidenti Shavkat Mirziyoyevning amakivachcha tog‘asi, Sovet Ittifoqi Qahramoni O‘runbek Yoqubov Ikkinchi jahon urushi davrida Oder daryosini kechib o‘tish operatsiyasida vermaxtning 20 nafardan ortiq askar va ofitserini yo‘q qilgan. Bu haqda TASS agentligi arxiv hujjatlariga tayanib xabar berdi.
Ma’lum qilinishicha, O‘runbek Yoqubov 31-o‘qchi diviziyaning 248-o‘qchi polki minomyot rotasi hisob komandiri bo‘lib xizmat qilgan.
Mukofot hujjatlariga ko‘ra, u 1945-yil 24-yanvar kuni Oder daryosini kechib o‘tish vaqtida o‘z minomyotidan o‘t ochish orqali piyoda qo‘shinlarni qo‘llab-quvvatlab, platsdarmni egallashga yordam bergan.
Shuningdek, Yoqubov minomyotlarni g‘arbiy qirg‘oqqa olib o‘tib, ikki kun davomida dushmanning yettita qarshi hujumini qaytarishda qatnashgan. Hujjatlarda uning ikki o‘t ochish nuqtasi hamda 20 nafardan ortiq vermaxt askari va ofitserini yo‘q qilgani qayd etilgan.
O‘runbek Yoqubov 1944-yilda Dnepr daryosini kechib o‘tish vaqtida uch kun davomida dushmanning 15 ta qarshi hujumini qaytargani uchun Sovet Ittifoqi Qahramoni unvoni bilan taqdirlangan.
Bundan tashqari, u “Jasorat uchun”, “Kavkaz mudofaasi uchun” medallari hamda Qizil Yulduz ordeni bilan mukofotlangan.
