O‘zbekiston Prezidenti 29-Yevroosiyo iqtisodiy sammiti ishtirokchilariga murojaat yo‘lladi
Sammit ishtirokchilari Samarqand shahrida bo‘lib o‘tadigan Global ekologik jamg‘arma Assambleyasi hamda Suvni tejash bo‘yicha butunjahon forumiga taklif qilindi.
O‘zbekiston Prezidenti Shavkat Mirziyoyev 29-Yevroosiyo iqtisodiy sammiti ishtirokchilariga murojaat yo‘llab, anjuman yetakchi siyosatchilar, ishbilarmon doiralar va ekspertlar hamjamiyati vakillarini birlashtirgan muhim muloqot maydoni sifatida o‘zini namoyon etganini ta’kidladi.
Murojaat O‘zbekiston prezidenti huzuridagi Xavfsizlik kengashi kotibi o‘rinbosari Eldor Oripov tomonidan o‘qib eshittirildi.
Davlat rahbari sammitning Istanbul shahrida o‘tkazilayotgani alohida ramziy ma’noga ega ekanini qayd etdi. Ta’kidlanishicha, asrlar davomida ushbu shahar Yevropa va Osiyo o‘rtasida ko‘prik bo‘lib, mintaqalararo madaniy hamda savdo-iqtisodiy aloqalar rivojiga beqiyos hissa qo‘shib kelgan.
Prezident o‘z murojaatida zamonaviy Turkiyada Rejep Tayyip Erdogʻanning “Turkiya asri” strategik g‘oyasi muvaffaqiyatli amalga oshirilayotganini alohida mamnuniyat bilan qayd etdi.
Shuningdek, Turkiya global kun tartibidagi dolzarb muammolarni samarali hal etish yo‘lida o‘z sa’y-harakatlarini to‘liq safarbar etib, xalqaro munosabatlarning ishonchli va nufuzli ishtirokchisiga aylanib borayotgani ta’kidlandi.
Prezident Erdog‘anning qat’iy intilishlari tufayli bugun O‘zbekiston va Turkiya munosabatlari keng ko‘lamli strategik sheriklik darajasiga ko‘tarilgani qayd etildi.
Murojaatda sammitning asosiy mavzularidan biri sifatida suv tanqisligi va “yashil” resurslar sharoitida global mas’uliyat masalasi alohida ahamiyat kasb etayotganiga to‘xtab o‘tildi. Prezident dunyo tobora kuchayib borayotgan iqlim xavf-xatarlariga, jumladan, cho‘llanish, tuproq yemirilishi, suv tanqisligi va ekologik vaziyat yomonlashuviga duch kelayotganini ta’kidladi.
Davlat rahbari Markaziy Osiyoda ushbu jarayonlar ayniqsa keskin namoyon bo‘layotganini bildirib, harorat oshish sur’atlari jahon o‘rtacha me’yorlaridan yuqori ekani, muzliklar yemirilayotgani va tuproq degradatsiyasi kuchayayotganiga e’tibor qaratdi.
Prezident so‘zlariga ko‘ra, ekologik barqarorlikni ta’minlash Yangi O‘zbekistonni taraqqiy ettirishning ustuvor yo‘nalishlaridan biriga aylangan. “Yashil makon” loyihasi doirasida har yili 200 million tup daraxt ekilayotgani, Orol dengizining qurigan tubida esa ulkan yashil himoya maydonlari yaratilayotgani bildirildi.
Shuningdek, O‘zbekiston rivojlanishning yashil modeliga izchillik bilan o‘tayotgani, zararli chiqindilar hajmini 35 foizga qisqartirib, 2035-yilga qadar bu ko‘rsatkichni 50 foizgacha kamaytirish maqsad qilingani qayd etildi.
Murojaatda suv resurslarini samarali boshqarish, jumladan, suv tejovchi texnologiyalarni joriy etish bo‘yicha chora-tadbirlar amalga oshirilayotgani, bu esa har yili katta miqdorda suv zaxiralarini tejash imkonini berayotgani ta’kidlandi.
Prezident O‘zbekiston bundan buyon ham “yashil” kun tartibini faol ilgari surish va global ekologik xavflarni samarali hal etish yo‘llarini topishga hissa qo‘shishni davom ettirishini bildirdi.
Shuningdek, sammit ishtirokchilari mamlakatda o‘tkaziladigan xalqaro tadbirlarga, xususan, Samarqand shahrida bo‘lib o‘tadigan Global ekologik jamg‘arma Assambleyasi hamda Suvni tejash bo‘yicha butunjahon forumiga taklif qilindi.
Yakunda davlat rahbari O‘zbekiston keng ko‘lamli hamkorlik uchun doim ochiq ekanini va kelgusida ham barqaror rivojlanishni ta’minlashga ko‘maklashishga tayyorligini ta’kidladi.
“Biz barcha sa’y-harakatlarimizni birlashtirgan holdagina bugungi va kelgusi avlodlar uchun farovon kelajakni ta’minlay olamiz. Sammit qatnashchilari faoliyatiga omad va katta amaliy natijalar yor bo‘lishini tilayman”, dedi Prezident.
