Soliq qo‘mitasi kartadan-kartaga o‘tkazmalarni tekshirishni boshladi
Qo‘mita bu jarayon iqtisodiy adolatni ta’minlash, yashirin aylanmalarni qisqartirishga qaratilganini bildirdi.
O‘zbekistonda soliq organlari ayrim tadbirkorlarning P2P o‘tkazmalarini tahlil qilishni boshladi. Bu haqda Soliq qo‘mitasi xabar berdi.
Ma’lum qilinishicha, savdo faoliyati bilan shug‘ullanuvchi ayrim xo‘jalik yurituvchi subyektlarda savdo amaliyotlari plastik kartadan plastik kartaga (P2P) pul o‘tkazmalari orqali amalga oshirilayotgani aniqlanmoqda.
Ayrim hollarda bunday o‘tkazmalar orqali tushgan daromadlar soliq hisobotlarida aks ettirilmayapti. Natijada davlat budjetiga tushishi lozim bo‘lgan mablag‘lar to‘liq shakllanmay qolmoqda.
Shu munosabat bilan soliq organlari yuridik shaxslarda faoliyat yurituvchi rahbar xodimlarning bank plastik kartalariga kelib tushgan mablag‘lar yuzasidan tahliliy o‘rganishlar olib bormoqda.
Aniqlangan holatlar asosida hisobotlarda ko‘rsatilmagan daromadlar bo‘yicha tegishli choralar ko‘rilayotgani va soliq to‘lovchilarga xabarnomalar yuborilayotgani bildirildi.
Soliq qo‘mitasi bu jarayon jazolash yoki bosim o‘tkazish emas, aksincha iqtisodiy adolatni ta’minlash, yashirin aylanmalarni qisqartirish hamda qonuniy faoliyat yuritayotgan tadbirkorlarni qo‘llab-quvvatlashga qaratilganini ta’kidladi.
Shuningdek, tadbirkorlik subyektlari savdo tushumlarini to‘liq rasmiylashtirishga va ularni soliq hisobotlarida haqqoniy aks ettirishga chaqirildi.
Avvalroq Markaziy bank tomonidan moliyaviy operatsiyalar ustidan nazoratni kuchaytirishga qaratilgan yangi tartiblar tasdiqlangani haqda xabar berilgandi. Unga ko‘ra, mamlakatdagi banklar ayrim yirik va shubhali deb topilgan tranzaksiyalarni kuchaytirilgan monitoring asosida kuzatib boradi.
