Endi O'zbekistonda banklar fuqarolarning yirik pul o‘tkazmalarini qatʼiy nazorat qila boshlaydi
Markaziy bank yirik va shubhali tranzaksiyalarni monitoring qilish bo‘yicha yangi tartiblarni tasdiqladi.
Markaziy bank tomonidan moliyaviy operatsiyalar ustidan nazoratni kuchaytirishga qaratilgan yangi tartiblar tasdiqlandi. Unga ko‘ra, mamlakatdagi banklar ayrim yirik va shubhali deb topilgan tranzaksiyalarni kuchaytirilgan monitoring asosida kuzatib boradi.
Qayd etilishicha, yangi hujjat orqali shubhali operatsiyalarni aniqlash mezonlari va indikatorlari yangilangan.
Yangi tartiblarga muvofiq, kuchaytirilgan monitoring ostidagi davlatlardan amalga oshiriladigan va umumiy summasi 1000 BHM — 412 million so‘mga teng yoki undan yuqori bo‘lgan pul o‘tkazmalari alohida nazoratga olinadi. Bu bir martalik tranzaksiya yoki 30 kun davomida amalga oshirilgan bir nechta operatsiyalarni ham o‘z ichiga oladi.
Shuningdek, xizmat ko‘rsatish yoki xizmatlar bilan bog‘liq qarzlarni qoplash bo‘yicha import shartnomalariga kiritilgan o‘zgartirishlar ham monitoring qilinadi. Bunda shartnoma summasi 5000 BHM — 2 milliard 60 million so‘mdan oshgan holatlar alohida kuzatuvga olinadi.
Bundan tashqari, 10,3 million so‘mdan ortiq pul o‘tkazmalari hamda 206 million so‘mdan yuqori naqd pul yechib olish operatsiyalari yuzasidan banklar maxsus tizimga qo‘shimcha ma’lumot kiritib boradi.
Rasmiylarga ko‘ra, mazkur choralar noqonuniy daromadlarni legallashtirish, yashirin moliyaviy aylanishlar va shubhali pul oqimlariga qarshi kurashish maqsadida joriy etilmoqda.
