AQSh delegatsiyasi Pekinga shaxsiy telefonlarsiz bordi
Tramp ma’muriyati Xitoy safarida vaqtinchalik qurilmalardan foydalandi.
AQSh prezidenti Donald Tramp boshchiligidagi rasmiy delegatsiya Xitoyga tashrif davomida kiberxavfsizlik choralarini kuchaytirgan. Fox News xabariga ko‘ra, Pekinga tashrif buyurgan amerikalik amaldorlar hamda yirik kompaniyalar rahbarlari ehtimoliy kiberhujumlar xavfi sabab shaxsiy telefon va noutbuklaridan foydalanmagan.
Ma’lum qilinishicha, delegatsiya a’zolari safar uchun maxsus tayyorlangan vaqtinchalik mobil qurilmalar va kompyuterlardan foydalangan. Ular orasida Apple, Boeing, Qualcomm hamda BlackRock kabi yirik korporatsiyalar rahbarlari ham bo‘lgani qayd etilgan.
Shuningdek, delegatsiya vakillariga qurilmalarni USB portlariga ulamaslik, noma’lum tarmoqlardan foydalanmaslik hamda ma’lumotlar xavfsizligini ta’minlash bo‘yicha maxsus tavsiyalar berilgan.
Eslatib o‘tamiz, Donald Trampning Xitoyga rasmiy tashrifi 15-mayga qadar davom etadi. Tashrif doirasida AQSh prezidenti va Xitoy raisi Si Szinpin Pekindagi Xalq yig‘inlari zalida muzokaralar o‘tkazdi.
