Yermak hibsga olindi: sud 3,19 mln dollarlik garov belgiladi

Ukrainaning Oliy aksilkorrupsiya sudi prezident Volodimir Zelenskiyning yaqin ittifoqchisi va prezident administratsiyasining sobiq rahbari Andriy Yermakni pul yuvish ayblovlari bilan hibsga olishga qaror qildi. Bu haqda Reuters xabar bermoqda.

 

Sud qaroriga ko‘ra, Yermak uchun 140 million grivna (3,19 million dollar) miqdorida garov puli belgilangan. Mablag‘ to‘langan taqdirda, u ish yuzasidan yakuniy qaror chiqmaguncha ozodlikka chiqarilishi mumkin.

 

“Menda bunaqa pul yo‘q. Endi advokatim garov uchun mablag‘ yig‘ish masalasida do‘stlar va tanishlar bilan ishlaydi”, — dedi Yermak sud qaroridan keyin jurnalistlarga.

 

U yana advokatlari apellyatsiya berishini bildirib, “Adolat va haqiqatga erishish uchun barcha qonuniy imkoniyatlardan foydalanamiz”, deya qo‘shimcha qilgan.

 

Ukraina rasmiylari Yermakni dushanba kuni yirik korrupsiya ishi bo‘yicha gumonlanuvchi sifatida e’lon qilgandi. Korrupsiyaga qarshi kurashuvchi idoralar ma’lumotiga ko‘ra, u Kiyev yaqinidagi elita turar joy majmuasi orqali qariyb 10,5 million dollar mablag‘ni legallashtirgan jinoiy guruh faoliyatida ishtirok etganlikda gumon qilinmoqda.

 

Yermak uzoq vaqt davomida Zelenskiydan keyingi Ukrainadagi eng ta’sirli siyosiy arboblardan biri sifatida ko‘rilgan. 

 

Sobiq kino prodyuseri va yurist bo‘lgan Yermak ko‘pincha prezident bilan birga ommaviy tadbirlarda qatnashgan hamda AQSh ko‘magidagi Rossiya—Ukraina tinchlik muzokaralarida Kiyevning bosh muzokarachisi sifatida ishitirok etgan.

 

Reuters qayd etishicha, Yermakka qo‘yilgan ayblovlar hozircha Zelenskiy hokimiyatiga bevosita tahdid solmaydi. Biroq tahlilchilar bu holat urushdan keyin prezident qayta saylanmoqchi bo‘lganda, uning obro‘siga uzoq muddatli zarar yetkazishi mumkinligini ta’kidlamoqda.

 

Bundan tashqari Politico nashri ham Yermak ishi tufayli Ukrainaning Yevropa Ittifoqiga qo‘shilishida muammolar paydo bo‘lishi mumkinligini yozgan.