Putin kelasi hafta Xitoyga rasmiy tashrif bilan boradi
Tashrifning asosiy mavzusi Rossiya va Xitoy o‘rtasidagi strategik sheriklik va ikki tomonlama munosabatlar bo‘ladi.
Rossiya prezidenti Vladimir Putin kelasi hafta Xitoyga tashrif buyurishi kutilmoqda. Bu haqda The Moscow Times xabar berdi.
Ma’lumotlarga ko‘ra, tashrif 19-20-kuni amalga oshiriladi. Manbalarning ta’kidlashicha, bu safar Pekinda yirik tantanalar yoki harbiy marosimlar o‘tkazilmaydi, tashrif asosan ikki tomonlama rasmiy muzokaralar doirasida bo‘ladi.
Kreml matbuot kotibi Dmitriy Peskov Putin Xitoyga safariga tayyorgarliklar olib borilayotganini tasdiqlab, aniq sana “yaqin kunlarda” e’lon qilinishini bildirgan.
Peskovga ko‘ra, tashrifning asosiy mavzusi Rossiya va Xitoy o‘rtasidagi strategik sheriklik va ikki tomonlama munosabatlar bo‘ladi. Shuningdek, Putin va Xitoy raisi Si Szinpin yaqinda Xitoyda o‘tkazilgan AQSh–Xitoy muzokaralari yuzasidan fikr almashishi kutilmoqda.
Agar tashrif amalga oshsa, bu bir oy ichida Xitoy tomonidan Rossiya va AQSh yetakchilarining qabul qilinishi bilan bog‘liq noyob diplomatik holat bo‘lishi qayd etilmoqda.
