Shavkat Mirziyoyev axaltaka otlari bo‘yicha jahon chempionati g‘oliblarini tabrikladi
Davlat rahbari musobaqa ishtirokchilari va mehmonlarni samimiy qutlab, bellashuvlarda yuksak mahorat, jasorat va milliy an’analarga sadoqat namunasini ko‘rsatgan sportchilarni e’tirof etdi.
O‘zbekiston Respublikasi Prezidenti Shavkat Mirziyoyev axaltaka otlari bo‘yicha “Sharq marvaridi — 2026” jahon chempionati g‘olib va sovrindorlariga tabrik yo‘lladi. Bu haqda Prezident matbuot xizmati xabar berdi.
Davlat rahbari musobaqa ishtirokchilari va mehmonlarni samimiy qutlab, bellashuvlarda yuksak mahorat, jasorat va milliy an’analarga sadoqat namunasini ko‘rsatgan sportchilarni alohida e’tirof etdi.
Qayd etilishicha, tantanali marosim Ashxobod shahridagi “Ashxobod” bog‘ida o‘tkazilgan bo‘lib, ushbu maskan O‘zbekiston va Turkmaniston xalqlari o‘rtasidagi ko‘p asrlik do‘stlik, yaxshi qo‘shnichilik, o‘zaro ishonch va mushtarak ma’naviy qadriyatlarning ramzi sifatida ta’riflangan.
Prezident nutqida Markaziy Osiyo xalqlari hayotida ot qadimdan ozodlik, mardlik, sadoqat, matonat va nafosat timsoli bo‘lib kelgani ta’kidlanib, bugungi kunda ham bu an’analar izchil davom ettirilayotgani qayd etildi.
Shuningdek, Turkmanistonda ot sportini rivojlantirish bo‘yicha amalga oshirilayotgan islohotlar, xususan Prezident Serdar Berdimuhamedov va Turkmaniston Xalq Maslahati Raisi Gurbanguli Berdimuhamedov rahnamoligida olib borilayotgan ishlar yuqori baholandi.
Mirziyoyev axaltaka tulporlari nafaqat turkman xalqining milliy iftixori, balki butun mintaqaning bebaho madaniy merosi ekanini alohida ta’kidladi.
Shuningdek, O‘zbekistonda milliy sport turlarini rivojlantirish, ot sportini ommalashtirish, nasldor yilqichilikni qo‘llab-quvvatlash va zamonaviy infratuzilma yaratish borasida keng ko‘lamli ishlar olib borilayotgani bildirildi.
Davlat rahbari mohir chavandozlar va mutaxassislar yosh avlodni vatanparvarlik, azm-u shijoat va sog‘lom turmush tarzi ruhida tarbiyalashga munosib hissa qo‘shayotganini qayd etdi.
Yakunda O‘zbekiston va Turkmaniston o‘rtasidagi madaniy-gumanitar aloqalarni yanada kengaytirish va do‘stlik rishtalarini mustahkamlash davom ettirilishi ta’kidlandi.
Prezident g‘olib va sovrindorlarni yana bir bor tabriklab, ularga mustahkam sog‘liq va faoliyatida ulkan muvaffaqiyatlar tiladi.
