10 ming qadam uchun pul to‘laydigan platforma ishga tushgan — Ekoqo‘mita
“Eko-faol fuqaro” platformasi 1-maydan faoliyat boshlagan bo‘lib, uni App Store va Play Market orqali yuklab olish mumkin.
O‘zbekistonda aholining ekologik madaniyatini oshirish va sog‘lom turmush tarzini targ‘ib qilishga qaratilgan “Eko-faol fuqaro” platformasi ishga tushirildi. Bu haqda Ekologiya qo‘mitasi matbuot xizmati Zamon.uz'ga ma’lum qildi.
Qo‘mita ma’lumotiga ko‘ra, platforma 1-maydan faoliyat boshlagan bo‘lib, uni App Store va Play Market orqali yuklab olish mumkin.
Loyiha prezidentning “Eko-madaniyat” umummilliy loyihasi doirasida ekologik ta’lim, ilm-fan va targ‘ibotni jadallashtirishga oid qarori asosida amalga oshirilmoqda. Hujjatda “10 ming qadam piyoda” tajribasini qayta tiklash hamda “Sog‘lom turmush tarzi” platformasi faoliyatini yo‘lga qo‘yish belgilangan.
Ekologiya qo‘mitasining bildirishicha, “10 ming qadam piyoda” aksiyasi doirasida fuqarolarni rag‘batlantirish, jumladan pul to‘lash tartibini ishlab chiqish ishlari bosqichma-bosqich davom etmoqda.
Avvalroq O‘zbekistonda “10 ming qadam piyoda” tashabbusi 1-maydan qayta ishga tushirilishi ma’lum qilingan edi.
Shuningdek, “1hls.uz” platformasi faoliyati uchun har yili Maxsus jamg‘arma hisobidan 10 milliard so‘m ajratilishi belgilangan.
Ma’lumot uchun, aholi orasida kunlik yurish va yugurishni ommalashtirish maqsadida 2021-yilning 1-iyunida “Sog‘lom turmush tarzi” — “1hls.uz” platformasi ishga tushirilgandi. Loyihaga muvofiq, 10 ming qadam yurgan fuqarolarga 3 ming so‘mdan pul to‘lash yo‘lga qo‘yilgandi. Loyiha prezidentning 2022-yil 6-apreldagi farmoni bilan bekor qilingandi.
