Saida Mirziyoyeva Londonda siyosatchilar va xalqaro moliya tashkilotlari rahbarlari bilan uchrashdi
Uchrashuvlarda UzNIF fondining xalqaro bozorga chiqishi, ESG standartlari, “yashil” obligatsiyalar va o‘zbek kompaniyalarining global bozorlarga integratsiyasi masalalarini muhokama qilindi.
Saida Mirziyoyeva Londonda Buyuk Britaniya va AQSH vakillari hamda xalqaro moliya tashkilotlari rahbarlari bilan uchrashuvlar o‘tkazdi.
Prezident administratsiyasi rahbari Buyuk Britaniya bosh vazirining investitsiyalar bo‘yicha maslahatchisi Varun Chandra hamda Markaziy Osiyo va Ozarbayjon bo‘yicha savdo vakili Jon Olderdays bilan muloqot qilganini ma’lum qildi.
Uchrashuv davomida UzNIF fondining xalqaro bozorlarga muvaffaqiyatli chiqishi va Britaniya ishbilarmon doiralarining O‘zbekistonga qiziqishi ortib borayotgani muhokama qilingan.
Qayd etilishicha, Buyuk Britaniyadan O‘zbekistonga yo‘naltirilgan investitsiyalar hajmi 1 milliard dollardan oshgan.
Shuningdek, Mirziyoyeva dunyodagi yirik aktiv boshqaruv kompaniyalaridan biri — "Franklin Templeton" bosh ijrochi direktori Jenni Jonson bilan ham uchrashuv o‘tkazgan.
Tomonlar O‘zbekistonda kapital bozorini rivojlantirish, moliyaviy boshqaruvga oid qonunchilikni takomillashtirish, xalqaro kliring tizimlari bilan integratsiya hamda Toshkent xalqaro moliya markazini tashkil etish masalalarini muhokama qilgan.
Saida Mirziyoyevaning qayd etishicha, Jenni Jonson IPO jarayoniga tayyorgarlik qisqa muddatda amalga oshirilgani va o‘zbek kompaniyalari aksiyalari savdosi yuqori natijalar ko‘rsatayotganini ta’kidlagan.
Bundan tashqari, Londonda AQSH prezidentining Janubiy va Markaziy Osiyo bo‘yicha maxsus vakili, elchi Serjio Gor bilan ham uchrashuv bo‘lib o‘tgan.
Muloqot davomida tomonlar o‘zaro aloqalarni yanada mustahkamlash istiqbollari va kelgusidagi hamkorlik yo‘nalishlarini muhokama qilgan.
Avvalroq Saida Mirziyoyeva London fond birjasi bosh ijrochi direktori Julia Enn Xoggett bilan ham uchrashgani xabar qilingandi.
