Turkiyada restorandagi otishma oqibatida 4 kishi halok bo‘ldi
Gumondorni qo‘lga olish uchun vertolyotlar yordamida qidiruv ishlari boshlangan. U 17 yoshda ekani aytilmoqda.
Turkiyaning Mersin viloyatida qurolli hujum oqibatida 4 kishi halok bo‘ldi, yana 8 kishi yaralandi. Bu haqda "Haberler" nashri xabar berdi.
Ma’lum qilinishicha, hodisa Tarsus tumaniga qarashli Kadelli Dyortler mahallasida yuz bergan. Gumondor M.O‘. mahalliy oshxonalardan biriga bostirib kirib, miltiqda o‘q uza boshlagan. Oqibatda muassasa egasi Sabri Pan shifoxonada vafot etgan, xodim Ahmet Erjan Jan esa voqea joyida halok bo‘lgan.
“Mersinning Tarsus tumanida 17 yoshli M.O. restoranga qarata avtomat bilan o‘q uzdi, natijada restoran egasi Sabri Pan va xodimi Ahmet Erjan Jan halok bo‘ldi”, deyiladi xabarda.
Hujumdan so‘ng avtomobilda qochgan gumondor yo‘l davomida yana ikki kishini o‘ldirgan.
Shuningdek, gumondor yana 8 kishiga tan jarohati yetkazgani aytilmoqda. Yaradorlar tuman davlat shifoxonasiga yetkazilib, nazoratga olingan.
Voqea joyiga politsiya va tez tibbiy yordam ekipajlari yuborilgan. Hozirda hududda xavfsizlik choralari kuchaytirilgan bo‘lib, gumondorni qo‘lga olish uchun vertolyotlar yordamida qidiruv ishlari olib borilmoqda.
Dastlabki ma’lumotlarga ko‘ra, qurbonlar va yaradorlar soni ortishi mumkin. Hodisa yuzasidan tergov harakatlari davom etmoqda.
Eslatib o‘tamiz, 2026-yil 15-aprel kuni Turkiyaning janubi-sharqidagi Qahramanmarash viloyatidagi maktabda yuz bergan otishmada to‘qqiz kishi halok bo‘lgan va 21 kishi jarohatlangan edi. 14-aprel kuni Shanliurfa viloyatidagi maktabda o‘n to‘qqiz kishi jarohat olgani xabar qilingan edi.
