Туркияда мактабдаги отишмаларда ҳалок бўлганлар сони 9 нафарга етди

Туркияда Шанлиурфа ва Қаҳрамонмарашда юз берган мактабдаги отишмалар юзасидан кенг кўламли тергов ҳаракатлари олиб борилмоқда. Бу ҳақда Anadolu ахборот агентлиги хабар берди.

 

Туркия Ички ишлар вазирининг маълум қилишича, Қаҳрамонмарашдаги ҳодиса оқибатида 9 киши ҳалок бўлган, уларнинг 8 нафари ўқувчи, бири ўқитувчи. Яна 13 киши тан жароҳати олган бўлиб, 6 нафари реанимацияда, 3 нафарининг аҳволи оғир деб баҳоланмоқда. Дастлаб 4 киши ҳалок бўлгани ҳақида хабар берилганди.

 

Расмий баёнотга кўра, жиноятни тарғиб қилувчи ва жамоат тартибига салбий таъсир кўрсатишга қаратилган материалларни тарқатган 83 нафар шахсга нисбатан қўлга олиш қарори чиқарилган ҳамда уларга нисбатан тегишли ҳуқуқий чоралар кўрилган. Шунингдек, 940 та ижтимоий тармоқ аккаунтига кириш чеклови жорий этилиб, 93 та Telegram гуруҳи ёпилган.

 

Қаҳрамонмарашдаги қуролли ҳужум юзасидан олиб борилган тергов доирасида ҳужумни содир этган шахс — Иса Арас Мерсинлининг отаси Угур Мерсинли ҳибсга олингани маълум қилинди. Дастлабки ўрганишларда гумонланувчининг WhatsApp профилида 2014 йилда АҚШда ҳужум содир этган Элёт Рожерга ишора қилувчи тасвирдан фойдалангани аниқланган.

 

Шанлиурфанинг Сиверек туманида содир бўлган яна бир мактаб ҳужуми юзасидан эса қўлга олинганлар сони 18 нафарга етди. Тергов давомида таҳдидли изоҳлар қолдирган ҳамда ёлғон маълумотларни очиқ тарқатган шахслар ҳам аниқланиб, ушланган. Ушбу отишмада ҳужум қилган шахс ўз жонига қасд қилган ҳамда 16 киши яраланганди.

 

Ҳодиса юзасидан кенг қамровли тергов ишлари олиб борилмоқда. Ички ишлар вазирлиги томонидан 4 нафар маъмурий ва 4 нафар полиция бош инспектори жалб этилган. Адлия вазирлиги 3 нафар бош прокурор ўринбосари ҳамда 4 нафар прокурорни ишга сафарбар қилган. 

 

Шунингдек, Миллий таълим вазирлиги томонидан ҳам алоҳида текширувлар бошланган.