O‘zbekistonda jarima ballari 12 balldan oshgan haydovchilar soni 107 nafarga yetdi
Endilikda ular haydovchilik huquqidan sud tartibida mahrum etiladi. Qayta imtihon esa 50 ta savoldan iborat bo‘ladi.
O‘zbekistonda jarima ballari 12 balldan oshgan haydovchilar soni 107 nafarga yetdi. Bu haqda Yo‘l harakati xavfsizligi xizmati axborot xizmati ma’lum qildi.
Qayd etilishicha, endilikda ushbu haydovchilar sud tartibida haydovchilik huquqidan mahrum qilinadi. Shundan so‘ng ular majburiy o‘quv kurslarida qatnashib, qayta nazariy va amaliy imtihon topshirishi talab etiladi.
Yangi tartibga ko‘ra, nazariy imtihon odatdagidek 20 ta emas, 50 ta savoldan iborat bo‘ladi. Imtihondan o‘tish uchun haydovchi kamida 46 ta savolga to‘g‘ri javob berishi shart.
1-may kuni jarima ballari 12 balldan oshgan ilk haydovchi aniqlangan edi. 8-may holatiga ko‘ra, bunday haydovchilar soni 49 nafarni tashkil qilgan.
Eslatib o‘tamiz, 2025-yil 1-iyundan boshlab yo‘l-patrul xizmati xodimlari tomonidan Ma’muriy javobgarlik to‘g‘risidagi kodeksning 12 ta moddasi asosida rasmiylashtirilgan bayonnomalar uchun jarima ballari hisoblanmoqda.
Shuningdek, 2026-yilning 1-aprelidan esa qoidabuzarliklarni avtomatik ravishda aniqlovchi qurilmalar tomonidan aniqlangan qoidabuzarliklar uchun ham jarima ballari qo‘llanishi boshlangan. Ular qatoriga svetoforning taqiqlovchi ishorasiga bo‘ysunmaslik, to‘xtash va to‘xtab turish qoidalarini buzish, yo‘lning qarama-qarshi bo‘lagida harakatlanish va tezlik qoidalariga amal qilmaslik kabi qoidabuzarliklar kiradi.
