Qashqadaryoda kuchli sel oqibatida 25 yoshli yigit halok bo‘ldi
Voqea 19-may kuni G‘injak qishlog‘ida yuz bergan. Yigit adirda mol boqib yurgani aytilmoqda.
Qashqadaryo viloyatining Dehqonobod tumanida kuchli sel oqimi sabab 25 yoshli yigit halok bo‘ldi. Bu haqda “Daryo” xabar berdi.
Ma’lum qilinishicha, voqea 19-may kuni tumanning G‘injak qishlog‘ida sodir bo‘lgan. Adir hududida mol boqib yurgan 25 yoshli yigit sel oqimida oqib ketgan.
Qishloq aholisi vakillaridan biriga ko‘ra, sel juda yuqori bosim va tezlikda kelgani sabab yigit o‘zini qutqarib qolishga ulgurmagan.
“Afsuski, ko‘p o‘tmay, suvdan uning jonsiz tanasi topildi”, degan u.
Marhumning jasadi qutqaruvchilar va mahalliy aholi tomonidan olib borilgan qidiruv ishlaridan so‘ng voqea joyidan taxminan 3 kilometr uzoqlikdan topilgan.
Mahalliy aholi ma’lumotiga ko‘ra, halok bo‘lgan yigit yaqinda Rossiyadan mehnat muhojirligidan qaytgan.
Hodisadan keyin marhumning xonadoniga tuman hokimligi mas’ullari, MFY raisi hamda mahalla profilaktika inspektori borgan.
Manbaga ko‘ra, tuman prokuraturasi xodimlari ham voqea joyiga kelib, jasadni ko‘zdan kechirgan va ekspertiza tayinlangan. Marhumning janozasi 20-may kuni o‘tkazilgan.
Bosh prokuratura matbuot kotibi Hayot Shamsutdinov nashr so‘roviga javoban voqea haqiqatda sodir bo‘lganini tasdiqlagan.
Uning ma’lum qilishicha, hodisa haqida 19-may kuni soat 20:20 larda tuman IIBga xabar kelib tushgan.
“Holat yuzasidan tuman prokuraturasi tomonidan tergovga qadar tekshiruv harakatlari olib borilmoqda. Tekshiruv yakunlariga ko‘ra qonuniy qaror qabul qilinishi ta’minlanadi”, degan u.
Avvalroq Favqulodda vaziyatlar vazirligi Namangan, Jizzax va Qashqadaryo viloyatlarida kuzatilgan sel oqimlari oqibatida uylarga zarar yetmagani haqida ma’lumot bergandi.
Shuningdek, vazirlikka tan jarohati olganlar bo‘yicha ham ma’lumot kelib tushmagani bildirilgan.
